Vörubílsstjóri á sjötugsaldri valinn glæsilegasti öldungurinn

Aureo do Nascimento, 63 ára gamall brasilískur vörubílsstjóri, er fallegasti öldungur Sao Paulo borgar. Hann varð hlutskarpastur í fegurðarsamkeppni eldri karla þar í borg en keppnin fór fram í gær.

„Keppnin er frábær og gerir mikið fyrir karla sem taka þátt í henni. Hún hjálpar við að minnka fordóma í garð miðaldra manna,“ segir Nascimento. Hann varð hlutskarpastur 22 keppenda. Sá yngsti var 62 ára en öldungur hópsins hafði séð rúmlega 94 ár.

Að auki voru veitt verðlaun fyrir fágaðasta keppandann, þann feimnasta og þann brosmildasta. Dómnefndin var að sjálfsögðu skipuð fimm konum á svipuðu aldursbili og keppendurnir sjálfir eru á.