Elín Hirst, þingmaður Sjálfstæðisflokksins, birtir mynd á Facebook-síðu sinni í gærkvöld frá hvalaskoðun á Húsavík. Við myndina skrifar hún um hvalaskoðunina:

„Stórkostlega mikilvæg atvinnugrein fyrir íslenskt þjóðarbú. Mun mikilvægari en hvalveiðar sem standa okkur fyrir þrifum; því er nauðsynlegt að mæta og horfast í augu við.“

Hvalveiðar Íslendinga hafa löngum verið umdeildar, bæði hér heima og erlendis, og sagði Gunnar Bragi Sveinsson, utanríkisráðherra, Ísland stundum litið hornauga vegna veiðanna.

Í viðtali við Skessuhorn sagðist ráðherrann þeirrar skoðunar að Íslendingar ættu að íhuga að draga úr veiðunum. Kom meðal annars fram að Íslendingum hefur ekki verið boðið á ráðstefnur er varða málefni hafsins vegna veiðanna.