Táknræn svört slaufa á útskriftarnemum

Sjötíu hjúkrunarfræðingar sem útskrifuðust við hátíðlega athöfn Háskóla Íslands í dag í Laugardalshöll báru svarta slaufu sem þeir segja að eigi að tákna endalok launamunar kynjanna.  



Hafa fengið bakþanka með námsvalið

Hjúkrunarfræðingarnir segjast sumir ekki hafa komist hjá því að fá bakþanka á einhverjum tímapunkti með námsvalið og bjóðast önnur störf sem eru betur launuð en hjúkrunin.

Álfheiður Snæbjörnsdóttir og Katla Marín Berndsen voru meðal hjúkrunarfræðinga sem útskrifuðust í dag.  Álfheiður sagði í fréttum Stöðvar tvö í dag að hún hefði talið þegar hún hóf námið að þegar því lyki væri hún búin að koma sér og börnunum sínum vel fyrir. „Ég er einstæð móðir og sé mér ekki alveg fært að vinna vaktavinnu. Þannig að þetta er ekki alveg að ganga hjá mér að ætla að vinna við hjúkrun”. Álfheiður hefur fengið atvinnutilboð sem tækniteiknari á hærri launum en við hjúkrun en því námi, sem er styttra en hjúkrunarnámið, lauk hún áður.  Hún segist ekki vita hvernig hún geti afþakkað hærri laun við annað starf. 



Getur farið til Svíþjóðar

Katla Marín lítur til Svíþjóðar. „Eins og staðan er í dag er ég ekki viss hvað ég geri í haust. Ég ólst upp í Svíþjóð og það óneitanlega heillar þegar staðan er svona á Íslandi að fara út”. Hinir nýbökuðu fræðingar segjast þó umfram allt samt stoltir og glaðir yfir því að hafa staðið undir væntingum sem gerðar eru til hjúkrunarfræðinga á Íslandi, eins og segir í yfirlýsingu frá þeim. Bjart var yfir öllum í höllinni í dag en það bar á dökkum blettum í formi svartar slaufu sem nýútskrifuðu hjúkrunarfræðingarnir báru. 



Stoltar af því að tilheyra hjúkrunarstéttinni

Ágústa Kristín Andersen úrskrifaðist líka í dag. Hún segir blendnar tilfinningar að útskrifast við þessar aðstæður en hún sé stolt eins og aðrir sem fá prófskírteinið sitt í hjúkrun í dag. Konurnar séu stoltar af því að tilheyra hjúkrunarfræðistéttinni. 



Slaufan stuðningur og „jarðarför"

Um svörtu slaufuna segir Ágústa hana tákna til dæmis endalok ríkjandi ástands þar sem kynjabundinn launamunur ríki enn. „Það er löngu kominn tími á að því linni. Slaufan sé líka tákn um stuðning við togstreitu og sem hjúrkunarfræðingar finni í sinni kjarabaráttu. „Hún er ekki síður tákn um endalok kynjabundins launamunar og því að jarða verði feðraveldið”, sagði Ágústa.