„Svo varð mér ljóst að ég vildi ekki fyrirfara mér heldur vildi ég gera byltingu"

Heimsfrægi heimilislæknirinn og hugsjónamaðurinn Patch Adams gladdi börn og starfsfólk Barnaspítala Hringsins í dag þegar hann leit þar við í heimsókn. 

Patch Adams er staddur hér á landi á vegum Hugarafls og verður með fyrirlestur í Háskólabíói á sunnudag en þetta er í annað skipti sem hann heimsækir landið.

Adams er þekktur fyrir óhefðbundnar leiðir í starfi sínu og nálgast sjúklinga sína með umhyggju, gleði og humor að vopni.

Eflaust muna margir eftir samnefndri kvikmynd um ævi hans sem kom út árið 1998 þar sem Robin Williams fór á kostum í hlutverki Patch Adams.

"Mér varð ljóst að trúarbrögðin voru óekta og að ríkisstjórnin væri óekta. Og það hryggði mig. Og þar sem mamma gaf mér allt nema byltingu, hún var ekki aðgerðarsinni, þá vissi ég ekki hvað ég ætti að gera. Ég vildi deyja. Reyndar var ég mjög hamingjusamt barn. Ég var ekki þunglyndur og vildi deyja. En ég var mjög ráðvilltur varðandi hatur.”

Adams reyndi þrisvar sinnum fyrir 18 ára aldur að taka eigið líf vegna óréttlæti heimsins.

„Svo varð mér ljóst að ég vildi ekki fyrirfara mér heldur vildi ég gera byltingu. Mikilvægur hluti byltingarinnar er að binda enda á kapítalíska kerfið sem ég tel versta sjúkdóm sögunnar. Að gera peninga af guði.”

Eftir þriðja skiptið ákvað hann að í stað þess að deyja myndi hann vera glaður hvern einasta dag og reyna láta gott af sér leiða.

„Í heimi kærleikans er allt sem er án ofbeldis það besta. Að vera lifandi, eiga vini og hafa tilgang með því að elska heiminn.“

Hann hefur tileinkað lífi sínu því að boða út kærleikinn og ferðast 300 daga á ári milli landa til þess að halda fyrirlestra og hitta sjúklinga.