Átelja Framkvæmdasýslu ríkisins

Samtök Iðnaðarins, fyrir hönd Fjarðarbyggðar, átelja ákvörðun Framkvæmdasýslu ríkisins um að velja Náttúrustofu Vestfjarða sem einn af fjórum bjóðendum í lokuðu útboði um umhverfismat vegna ofanflóðavarna á Norðfirði. Samtökin segja að þátttaka þeirra í opinberu útboði skapi tortryggni um að ójafnræði ríki á meðal bjóðenda.

Sérstaklega þar sem aðrir bjóðendur starfi að öllu leyti á almennum samkeppnismarkaðir. Þetta kemur fram í tilkynningu frá SI. Þar segir að samtökin vilji hvetja til þess að opinberir aðilar hafi hagræðingar- og samkeppniskröfur íslensks réttar að leiðarljósi við kaup á vöru og þjónustu í landinu.

„Stefna stjórnvalda er skýr í þessum málaflokki enda eru sameiginlegir hagsmunir allra að frjáls samkeppni og hvati til hagræðingar fari saman. Það eykur hagvöxt og stuðlar að heilbrigðum viðskiptaháttum hér á landi. Tilgangur með reglum um opinber innkaup er m.a. að lækka verð, auka á gegnsæi og jafnræði á markaði sem og skapa tækifæri til nýsköpunar og nýrra viðskiptatækifæra.“

Björg Ásta Þórðardóttir, lögfræðingur SI segir að þegar svona standi á verði að gera þá kröfu að opinber aðili sýni með skýrum hætti fram á að sá hluti rekstrarins sem útboðið tekur til sé fjárhagslega aðskilinn opinberum hluta stofnunarinnar.

„Sé þess ekki gætt teljum við að framangreindum markmiðum laga verði ekki náð enda getur niðurgreiðsla íslenska ríkisins og sveitarfélaga á tilboðum opinberra aðila aldrei samræmst hagræðingar- og samkeppniskröfum íslensks réttar.“