Helga nýr forstjóri Persónuverndar

Helga Þórisdóttir hefur verið skipuð forstjóri Persónuverndar frá 1. september næstkomandi. Helga hefur gegnt embætti staðgengis forstjóra og sviðsstjóra lögfræðisviðs Lyfjastofnunar.

Í frétt innanríkisráðuneytisins segir að Helga hafi lokið embættisprófi í lögfræði frá Háskóla Íslands árið 1995 og námi í stjórnun frá IESE Business School á Spáni 2015.

„Helga hefur setið margs konar námskeið á sviði lögfræði og stjórnsýslu og stjórnunar. Hún hefur starfað hjá embætti ríkissaksóknara, á nefndasviði Alþingis, hjá EFTA í Brussel og menntamálaráðuneytinu. Frá árinu 2008 hefur Helga starfað hjá Lyfjastofnun, sem sviðsstjóri lögfræðisviðs og staðgengill forstjóra. Árið 2012 til 2013 var hún settur forstjóri Lyfjastofnunar. Helga var meðal sex umsækjenda um embættið sem auglýst var í lok mars.“

Umsækjendur um stöðuna voru:

Alma Tryggvadóttir, lögfræðingur, settur forstjóri Persónuverndar

Helga Þórisdóttir, lögfræðingur, sviðsstjóri lögfræðisviðs Lyfjastofnunar

Hilmar Einarsson, lögfræðingur, sjálfstætt starfandi

Kolbrún Ásta Bjarnadóttir, nemi

Sif Konráðsdóttir, lögfræðingur, Senior Officer á samkeppnis- og ríkisaðstoðarsviði EFTA

Þorsteinn Sigurðsson, menntaður í tölvunarfræði og rafeindavirkjun, afgreiðslumaður