Innlent

Segir sambærilegar ráðstefnur erlendis mun dýrari

Stefán Árni Pálsson skrifar
Geena Davis mætir í Hörpuna.
Geena Davis mætir í Hörpuna.
„Þetta er gríðarlega spennandi mál en WE er alþjóðlegt samtal helstu sérfræðinga um efnahagslegt, viðskiptalegt og samfélagslegt virði til þess að brúa kynjabilið,“ segir Halla Tómasdóttir, ráðstefnustjóri, alþjóðlegu ráðstefnunnar Inspirally WE 2015 sem verður haldin í Hörpu í sumar í tilefni af því að 100 ár eru liðin frá því að konur fengu kosningarétt.

Geena Davis, leikkona og stofnandi The Geena Davis institute og Christine Lagarde, forstjóri Alþjóðagjaldeyrissjóðsins taka þátt í ráðstefnunni meðal annarra.

„Hingað eru að koma helstu sérfræðingar frá mörgum af bestu háskólum í heimi og fólk sem sinnir þessum málaflokki allstaðar í heiminum. Til þess að læra meðal annars af Íslandi sem stendur fremst hvað þetta varðar.“

Vísir greindi frá því í gær að það kosti 750 evrur sem jafngildir um 109 þúsund íslenskum krónum á ráðstefnuna. Það verð gildir til 15. maí en eftir þann tíma hækkar verðið um 200 evrur og verður því 950 evrur sem jafngildir rétt tæplega 140 þúsund krónum.

Sjá einnig: Jafnréttisráðstefna í Hörpu: Kostar formúu að sjá Geenu Davis

„Það er í rauninni verið að halda þetta þannig að vonandi náist endar saman. Það er gríðarlega dýrt að fá sérfræðinga beggja megin Atlantshafsins til að koma hingað og sérstaklega á þessum dýra tíma þegar flug og hótel kosta mikið,“ segir Halla en ráðstefnan fer fram dagana 18.-19. júní.

Halla segir að hægt verði að fylgjast með ráðstefnunni á vefnum og á samfélagsmiðlum.

„Það eiga því allir að geta tekið þátt og lært af þessu. Það er líka hægt að setja þetta í samhengi en eins dags námskeið með einum sérfræðingi kostar það sama hjá Endurmenntun. Hjá okkur eru yfir tuttugu helstu hugsuðir, sérfræðingar og breytingarstjórar á þessum sviðum að koma saman á einum stað á verðmiða sem er um það bil þriðjungur til helmingur af því sem kostar á sambærilega ráðstefnur erlendis.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.