Fimm ár frá olíulekanum í Mexíkóflóa

Fimm ár eru nú liðin frá einum versta olíuleka sögunnar, þegar rúmir fimm hundruð milljón lítrar af olíu láku frá borpalli fyrirtækisins BP, í Mexíkóflóa. Umhverfisverndarsamtök segja olíufélög ekki hafa lært af mistökum BP. Á fimm árum hefur borpöllum á svæðinu fjölgað úr 35 í 48 og olíufélög vilja nú bora mun dýpra en BP gerði.

Þá segja gagnrýnendur olíufélaganna að enn hafi ekki verið fundnar nægjanlegar öryggisráðstafanir sem gætu komið í veg fyrir annað stórslys.

Samkvæmt AP fréttaveitunni hafa yfirvöld samþykkt um 24 nýja borpalla á miklu dýpi. Samkvæmt rannsókn þeirra hefur meðaldýpi borpalla á svæðinu aukist um 40 prósent frá árinu 2010. Þar að auki liggja þær ríku olíu- og gaslindir sem menn vilja komast í, undir um sex kílómetrum af jarðlögum frá botni sjávar.

Talið er að mögulega væri hægt að vinna allt að 300 þúsund tunnur af olíu á dag á svæðinu. Það liggur þó undir þykku saltlagi sem gerir borunina enn flóknari.

Frá BP slysinu segja embættismenn og forsvarsmenn iðnaðarins að öryggi hafi verið bætt töluvert. Auk þess sé búið að bæta hreinsibúnað, ráða fleiri eftirlitsmenn betrumbæta öryggisstaðla. Gagnrýnendur segja þó að borunartæknin sé komin langt fram úr öllum öryggisatriðum.