Búlgarar ætla að byggja gasleiðslu til að minnka þörf á rússneskri orku

Búlgörsk stjórnvöld ætla sér að byggja 220 milljóna evru gasleiðslu til Rúmeníu og Grikklands til að draga úr þörf sinni á að kaupa gas frá Rússlandi. Leiðslan kostar að jafnvirði 32 milljarða íslenskra króna. Wall Street Journal fjallar um málið.

Búlgarar kaupa um 95 prósent af gasi sem notað er í landinu frá Rússlandi. Þar ræður orkurisinn Gazprom ríkjum, sem er í meirihluta eigu rússneska ríkisins.

Greint er frá þessu í beinu framhaldi af því að Evrópusambandið tilkynnir um málshöfðun á hendur rússneska fyrirtækinu Gazprom. Sambandið hefur höfðað mál á hendur fyrirtækinu fyrir að misnota markaðsráðandi stöðu sína. Stjórnendur Gazprom neita sök.

Evrópusambandið hóf rannsókn sína á Gazprom fyrir þremur árum síðan en stjórnvöld í Moskvu hafa sagt rannsóknina pólitíska.