Bæði bjartsýn á að ná kjöri

Jón Atli Benediktsson, sem hlaut flest atkvæði í fyrri umferð í rektorskjöri við Háskóla Íslands, er bjartsýnn á að ná kjöri í seinni umferðinni eftir viku. Guðrún Nordal sem hlaut næst flest atkvæði er telur sig eiga ágæta möguleika á að ná kjöri en bæði séu þau staðráðin í að vinna vel fyrir Háskólann.

Jón Atli Benediktsson aðstoðarrektor vísinda og kennslu við Háskóla Íslands og prófessor í rafmagns- og tölvuverkfræði við skólann hlaut 48,9 prósent atkvæða í rektorskjöri en úrslitin voru ljós í gær. Guðrún Nordal forstöðumaður stofnunar Árna Magnússonar í íslenskum fræðum hlaut 39,4 prósent atkvæða.

Kom Jóni Atla ekki á óvart

Þar sem hvorugt þeirra hlaut meira en helming atkvæða þarf að kjósa á milli þeirra tveggja aftur. En þriðji frambjóðandinn, Einar Steingrímsson hlaut 9,7 prósent atkvæða. Jón Atli segist fara óhræddur í seinni umferðina.

„Og ég þakka kærlega fyrir mikinn stuðning. Það er nú yfirleitt þannig í rektorskosningum að það er farið í tvær umferðir og það kemur mér ekki á óvart að það hafi gerst í þetta skipti líka,“ segir Jón Atli.

Hann sé bjartsýnn á árangur í seinnin umferðinni en það sé heilmikil vinna framundan fram að kosningunni í næstu viku og hann leggi glaður í þá vinnu.

„Ég legg áherslu á það að Háskóli Íslands er alhliða háskóli sem er sterkur rannsóknarháskóli en hefur miklar skyldur við íslenskt samfélag. Það þarf að fara í ýmsar breytingar og ég tel að mín reynsla og þekking á háskólastarfi muni nýtast mjög vel í því breytingaferli,“ segir Jón Atli.

Meirihlutinn með Guðrúnu og Einari

Guðrún Nordal segist spennt fyrir seinni umferðina í rektorskjörinu og þakklát fyrir þann mikla stuðning sem hún hafi fengið, eða 39,4 prósent eins og áður sagði. Hún telji sig eiga ágætan möguleika á að ná kjöri.

„Já það er allt opið. Við sjáum að meirihlutinn er með mér og Einari þannig að við sjáum að það er allt opið í þessu. Það verður bara gaman að sjá hvernig næstu dagar spilast út,“ segir Guðrún.

Keppnin milli hennar og Jóns Atla verði bróðurleg enda bæði staðráðin að vinna vel fyrir Háskólann. En þau koma úr nokkuð ólíkum áttum innan háskólans, hún úr hugvísundum og hann raunvísindum.

„Ég held að við verðum alltaf að hugsa breitt yfir skólann en auðvitað komum við úr sitthvorri áttinni varðandi okkar vísindi. En ég hef líka starfað mikið utan skólans á síðustu árum. Bæði innan Árnastofnunar og líka innan Vísinda- og tækniráðs og vísindageirans. Þannig að við komum með auðvitað með okkar ólíka bakgrunn að þessu starfi, hvort okkar sem verður fyrir valinu,“ segir Guðrún Nordal.