WikiLeaks birtir gögn úr Sony lekanum

WikiLeaks hafa birt tölvupóstsamskipti starfsmanna Sony sem stolið var í tölvuárás sem gerð var á fyrirtækið á síðasta ári. Yfir 170.000 tölvupóstum og 30.000 skjölum var stolið í árásinni sem bandarísk stjórnvöld hafa sagt vera á ábyrgð norðurkóreskra stjórnvalda.

Í yfirlýsingu á vef WikiLeaks sem birt var í dag er haft eftir Julian Assange, ritstjóra uppljóstrunarsíðunnar, að gögnin eigi að vera aðgengileg öllum þar sem Sony Pictures Entertainment sé stórt alþjóðlegt fyrirtæki sem standi í miðju alþjóðlegra deilna. 

Tölvupóstsamskiptin voru í deiglunni á síðasta ári eftir að þau voru birt á netinu af ónefndum tölvuþrjótum. Málið var rannsakað af lögregluyfirvöldum í Bandaríkjunum sem komust að þeirri niðurstöðu að glæpamenn tengdir Norður-Kóreu væru á bak við árásina.

Málið var allt hið vandræðalegasta fyrir Sony en meðal þess sem kom í ljós var að leikkonum var borgað minna í sumum tilfellum heldur en karlkyns mótleikurum þeirra, auk margra annarra umdeildra mála. 

Birting gagnanna setti sýningu kvikmyndarinnar The Interview einnig í uppnám en hætt var við að frumsýna hana í kvikmyndahúsum um jólin eftir að tölvuþrjótarnir settu fram kröfu um að myndin yrði aldrei sýnd. Hún var svo síðar gerð aðgengileg á streymisveitum á netinu.