Vél Turkish Airlines snúið við vegna sprengjuhótunar

Vél tyrkneska flugfélagsins Turkish Airlines var snúið við og lent á flugvelli í Istanbul í morgun eftir að sprengjuhótun barst.

Í frétt Reuters segir að vélin, sem er af gerðinni Boeing 737, hafi verið á leið frá Istanbul til Basel í Sviss. Hún var í búlgarskri lofthelgi þegar ákvörðun var tekin að snúa vélinni við. Miði hafði þá fundist í vélinni með þeim skilaboðum að sprengja væri um borð.

Að sögn tyrkneska blaðsins Hürriyet var háttsettur fulltrúi stjórnarandstöðuflokksins MHP um borð í vélinni. Sprengjusérfræðingar eru nú að störfum á flugvellinum í Istanbúl.