Sumarhiti bíður Norðmanna um og eftir helgi

Norðmenn hafa verið hvattir til að grafa upp stuttbuxurnar og sandalana enda mun hitinn víða fara yfir 20 gráður um og eftir helgina.

Í frétt Verdens Gang segir að veðrið verði mun betra í norsku höfuðborginni Ósló en á Kanarí um helgina og á pari við veðrið á Mallorca.

Að sögn er komandi hiti ekki rakinn til hlýrra vinda úr suðri heldur vegna gamaldags sólskins.

Veðurfræðingurinn Beathe Tveita segir að hitinn muni ná til stórra hluta í landinu og til mynda ná sautján gráðum í Bergen.

„Í Sørlandet verður veðrið hvað best og getur hitinn farið upp í 20 gráður í Kristiansand bæði á laugardag og á sunnudag. Næstu daga gæti hitinn hækkað í Ósló um tvær til þrjár gráður á hverjum degi. Hitastigið í Ósló gæti farið yfir 20 gráður á sunnudag, mánudag og þriðjudag,“ segir Tveita.

Rúmur mánuður er nú síðan norskir veðurfræðingar lýstu því yfir að vorið væri komið til landsins.