Rekin fyrir að hafa skotið kött í höfuðið með boga

Kristen Lindsey, bandarískur dýralæknir í Texas hefur verið rekin úr starfi eftir að hún birti mynd af sér haldandi á dauðum ketti sem hún hafði drepið með því að skjóta ör í gegnum hausinn honum. Örin var enn í dýrinu þegar myndin var tekin.

Undir myndina hafði dýralæknirinn skrifað í lauslegri þýðingu: „Fyrsta drápið mitt með ör og boga. Alla villiketti ætti að drepa með þessum hætti. Fæ væntanlega verðlaun sem dýralæknir ársins.“

Verðlaunin hlaut hún þó ekki en þess í stað ákváðu vinnuveitendur hennar að segja henni upp eftir að hafa borist þúsundir bréfa og símtala frá fólki sem var misboðið. Þá herma fregnir að umræddur köttur hafi verið í eigu eldri hjóna sem auglýstu eftir honum daginn sem Lindsey birti myndina.