Sleginn í andlitið með glasi í miðborginni

Nóttin var tiltölulega róleg hjá lögreglunni á höfuðborgarsvæðinu. Á þriðja tímanum í nótt var bifreið stöðvuð í Kópavogi. Ökumaðurinn grunaður um ölvun við akstur og akstur án ökuréttinda, samkvæmt dagbók lögreglu. Ökumaðurinn hefur ítrekað verið stöðvaður við akstur eftir að hann var sviptur réttindum.

Kvartað var undan partýlátum á heimili í Grafarvogi. Lögregla var kölluð til og voru tveir menn kærðir fyrir vörslu fíkniefna. Þá var maður handtekinn í Breiðholti rétt eftir klukkan eitt grunaður um að hafa ráðist á leigubílstjóra. Hann gisti fangageymslu í nótt.

Á öðrum tímanum í nótt var maður sleginn í andlitið með glasi í veitingahúsi í miðborginni. Brotaþoli er líklega nefbrotinn. Árásarmaðurinn fór af vettvangi en fannst skömmu síðar og gerði sig þálíklegan til að ráðast aftur á manninn. Árásarmaðurinn var handtekinn og gistir nú fangageymslu þar til að hægt verður að ræða við hann, að því er fram kemur í skýrslu lögreglu.