Tíu mánaða fangelsi fyrir að hóta lögreglumönnum lífláti

Íslenskur karlmaður á fimmtugsaldri hefur verið dæmdur í tíu mánaða fangelsi í Héraðsdómi Reykjaness fyrir líflátshótanir í garð lögreglumanna í kjölfar handtöku í nóvember 2013. Maðurinn játaði brot sitt skýlaust.

Maðurinn var handtekinn þann 16. nóvember 2013 og færður í lögreglubíl við Frakkastíg í Reykjavík. Hótaði hann við það tilefni einum lögreglumanni líkamsmeiðingum með því að segja „ég skal brjóta á þér andlitið“ auk þess að hafa hótað sama lögreglumanni og tveimur til viðbótar lífláti í bílnum á leiðinni á lögreglustöðina.

Maðurinn hefur þrettán sinnum verið dæmdur frá árinu 1998 en meðal þeirra brota sem hafa áhrif á dóminn er fimm ára skilorðsbundin refsing fyrir tilraun til mótspyrnu gegn lögreglu í Salzburg í Austurríki árið 2010. Þá var hann dæmdur í Hæstarétti í fimmtán mánaða fangelsi árið 2011 fyrir brot gegn ýmsum ákvæðum umferðarlaga og sömuleiðis í átján mánaða fangelsi fyrir brot á almennum hegningarlögum og vopnalögum árið 2008.

Ástæða þess að maðurinn fær tíu mánaða dóm skýrist meðal annars af 225 dögum sem maðurinn átti eftir að sitja af sér en honum var veitt reynslulausn af fyrri dómi. Ákærði lagði fram vottorð fyrir dómi þess efnis að hann væri að reyna að ná stjórn á áfengissjúkdómi sínum. Var tekið tillit til þess og skýlausrar játningar.

Dóminn í heild sinni má lesa hér.