„Gerum netið betra saman“

Alþjóðlegi netöryggisdagurinn verður haldinn hátíðlegur í tólfta sinn í dag. Þemað í ár er: „Gerum netið betra saman“ og munu netöryggismiðstöðvar þrjátíu Evrópuþjóða og yfir 100 þjóða um heim allan standa að skipulagðri dagskrá í dag.

SAFT vekur athygli á nýju fræðsluefni í tilefni dagsins og hvetur alla skóla landsins til að fjalla um netöryggi í dag og nýta það efni sem til er á síðunni. Þar er meðal annars að finna gagnvirkt efni fyrir öll stig grunnskóla, upplýsingahefti fyrir foreldra og börn um miðlanotkun, námsefni um hatursorðræðu á netinu, notkun snjalltækja, samfélagsmiðla og ýmislegt fleira.

Umræða um neteinelti og –öryggi hefur verið töluverð að undanförnu, en um það er meðal annars fjallað á vefsíðu SAFT. Ísland í dag sagði á dögunum sögu ungrar stúlku, Snædísar Birtu Ásgeirsdóttur, sem varð fyrir grimmu einelti sem að stórum hluta fór fram á veraldarvefnum. Selma Björk Hermannsdóttir á svipaða sögu að segja en frá því var greint á Vísi. Slíkt einelti kallast í dag „nútímaeinelti“ en eftir að internetið kom til sögunnar hefur einelti færst mikið í aukana og orðið grófara. Ýmsar upplýsingar neteinelti má finna á fyrrgreindri vefsíðu.

Þá var jafnframt greint frá því á Vísi í vikunni að myndböndum af slagsmálum íslenskra barna hefði farið í dreifingu á netið. Sérstakri síðu var haldið úti á samfélagsmiðlinum Facebook þar sem ungmennin deila myndböndum af slagsmálum. Upplýsingarit um samfélagsmiðla má sjá á vef SAFT.

Snædís Birta Ásgeirsdóttir sagði sögu sína í Íslandi í dag. Þar var rætt við Vöndu Sigurgeirsdóttur, lektor við menntavísindasvið Háskóla Íslands, sem segir foreldra þurfa að fylgjast betur með börnunum sínum og þora að segja nei. 'Foreldrar trúa engu slæmu upp á börnin sín og mér finnst að við þurfum að vera raunsæ. Ég segi mjög oft við foreldra 'rétt upp hönd ef þið luguð einhvern tímann að foreldrum ykkar“. Ég gerði það. [...] Við þurfum að fylgjast miklu betur með hvað þau eru að gera á netinu og tala um þetta við þau,“ sagði Vanda.