Biggi lögga: Ég fæ ekki krónu aukalega fyrir að vera einhver opinber „Biggi lögga“

„Ég er bara venjuleg lögga sem hef gaman af að segja mína skoðun,“ segir Birgir Örn Guðjónsson, betur þekktur sem Biggi lögga.

Biggi brást skjótt við og hefur nú svarað Björgvin Mýrdal, ritara Snarrótarinnar en Vísir ræddi við Björgvin sem furðar sig á frásögn og ummælum Bigga um kannabisolíu. Björgvin veltir því fyrir sér hvort verið geti að Biggi lögga sé að verja hagsmuni með því að blanda saman tali um skaðsemi kannabis og svo umræðunni um afglæpavæðingu og þá lögleiðingu fíkniefna; svo sérkennileg þykir honum frásögn Bigga sem sagði af því að hann hafi hitt unglinga með stóra krukku af kannabisolíu. Björgvin segir þetta ekki standast neina skoðun.

Biggi tók málið umsvifalaust upp á sinni Facebooksíðu og birtir þar nokkuð ýtarlega yfirlýsingu. Hann vísar samsæriskenningum Björgvins alfarið á bug. Hann segist ekki nein opinber fígúra, tákn lögreglunnar heldur hafi hann einfaldlega gaman að því tjá sig:

„Ehhh....er þetta grín? Mér finnst þetta allavega pínu fyndið, ég skal viðurkenna það haha. Ok, ég setti inn færslu á MÍNA fésnbókarsíðu þar sem ég sagði frá þessu. Þar sagði ég frá þessu kannabisjukki sem ég, ásamt fleiri lögreglumönnum, fann hjá tilteknum strák sem sagðist hafa lært að gera það í íslenskum sjónvarpsþætti. Þetta hefur greinilega farið fyrir brjóstið á ýmsum. Það er bara þannig. Það er samt margt nokkuð spes í þessari „frétt“. [...] Það að segja að svona umræða sé hrein og bein hagsmunagæsla fyrir mig er náttúrulega bara fyndið.“

Biggi segir að fráleitt sé að hann sé að afvegaleiða umræðuna. Afvegaleiðun sé að tala stanslaust um kannabis í lækningaskyni. Hann sé sannfærður um skaðsemi kannabisefna og telur forvarnir gegn efnunum sjálfum nauðsynlegar í þessari umræðu allri. Ef gripið er niður í ræðu Bigga:

„Ég er ekki einhver karakter sem er búinn til af lögreglunni í einhverri „ímyndarherferð“. Það sem ég segi kemur allt úr mínum eigin kolli. Ég er í löggunni aðallega út af því að ég vil hjálpa fólki og vegna þess að ég hef hugsjón fyrir bættu samfélagi.“

Hér fyrir neðan má sjá færslu Bigga löggu í heild sinni.

Færsla Bigga löggu í heild sinni

„Ehhh....er þetta grín? Mér finnst þetta allavega pínu fyndið, ég skal viðurkenna það haha. Ok, ég setti inn færslu á MÍNA fésnbókarsíðu þar sem ég sagði frá þessu. Þar sagði ég frá þessu kannabisjukki sem ég, ásamt fleiri lögreglumönnum, fann hjá tilteknum strák sem sagðist hafa lært að gera það í íslenskum sjónvarpsþætti. Þetta hefur greinilega farið fyrir brjóstið á ýmsum. Það er bara þannig. Það er samt margt nokkuð spes í þessari „frétt“.

Í fyrsta lagi sagði ég aldrei hvað þessi drengur hafi verið 16 ára.

Það að segja að svona umræða sé hrein og bein hagsmunagæsla fyrir mig er náttúrulega bara fyndið. Sorrý. Það væri sennilega bara mun þægilegra fyrir lögregluna ef þessi mál færu að meira mæli inn í heilbrigðiskerfið. Ef afglæpavæðing kannabisefna er skref í þá átt að bæta samfélagið þá er um að gera að ræða það frá öllum hliðum. Ég hef líka alltaf verið til í það. Bætt og öruggara samfélag er hagsmunamál allra. Líka lögreglumanna. Ég er samt sannfærður um skaðsemi kannabisefna og tel því forvarnir gegn efnunum sjálfum vera nauðsynlegar í þessari umræðu allri! Það er ekki hægt að „rugla saman skaða kannabis og umræðu um lögleiðingu“. Þetta tvennt helst alltaf í hendur.

Það er sagt að ég sé að afvegaleiða umræðuna. Persónulega finnst mér að verið sé að snúa hlutunum aðeins á hvolf. Mér finnst einmitt verið að afvegaleiða umræðuna með því að tala stanslaust um kannabis í lækningaskyni eða til þess að búa til efni í föt. Sannleikurinn er því miður sá að lang flestir nota kannabis til þess að ná sér vímuna. Ekkert annað. Gerir það þá sem nota kannabis eitthvað verri en þá sem gera það ekki? Nei. En neyslan getur gert margt slæmt fyrir einstaklinga og þá er um að gera að kerfið sé þannig útbúið að hægt sé að hjálpa þeim.

En aðal málið í þessum stutta fésbókarstatus mínum var að ég óttaðist að umræðan upphefði efnið og það sló mig þegar drengurinn sagðist stoltur hafa lært þetta af íslenskum sjónvarpsþætti og bætti því svo við að það væru örugglega allir að gera þetta. Það var allt og sumt.

Já og eitt að lokum. Ég er ekki einhver karakter sem er búinn til af lögreglunni í einhverri „ímyndarherferð“. Það sem ég segi kemur allt úr mínum eigin kolli. Ég er í löggunni aðallega út af því að ég vil hjálpa fólki og vegna þess að ég hef hugsjón fyrir bættu samfélagi. Svo er þetta náttúrulega eitt fjölbreyttasta starf í heimi og fullt af frábærum vinnufélögum. Ég fæ heldur ekki krónu aukalega fyrir að vera einhver opinber „Biggi lögga“. Ég er bara venjuleg lögga sem hef gaman af að segja mína skoðun. (Broskall).“