Börn gerendur í tugum mála

Á hverju ári koma tugir kynferðisbrota inn á borð Barnahúss þar sem barn brýtur gegn öðru barni. Í stórum hluta málanna er barnið, sem brýtur á öðru barni, ekki orðið sakhæft en er þó komið á þann aldur að hafa kynferðislegar hugsanir eða tilfinningar.

Ólöf Ásta Farestveit, forstöðukona Barnahúss, segir að ólíkt brotum fullorðinna gegn börnum eigi sér ekki stað svokallað „grooming“-ferli á undan. Það þýðir að börnin fara frekar beint inn í brotið í stað þess að vinna sér inn traust hjá þolanda og byrja smátt á brotunum. Hún telur að ofbeldið sé litað af klámi. Börn byrji að horfa á klám fyrr en áður. „Ég held að þar liggi rótin að þau eru svolítið að framkvæma það sem þau sjá. Sérstaklega í alvarlegustu málunum.“

Ólafur Örn Bragason sálfræðingur hefur tekið til meðferðar börnin sem brjóta á öðrum. Hann segir að öfugt við það sem margir haldi þá hafi tiltölulega fá þeirra sjálf orðið fyrir kynferðisofbeldi. „Það var mjög hátt hlutfall þar sem um einhvers konar þroskafrávik var að ræða. Margir með ADHD eða einhverfurófsgreiningar. Það einkennir þennan hóp,“ segir hann.

Hann segir margar kenningar vera uppi um hvers vegna sum börn brjóta á öðrum. Ýmislegt bendi til þess að misræmi á milli líkamlegs þroska og andlegs þroska spili þar inn í. „Þetta eru hvatvísir krakkar sem eiga margir hverjir erfitt með að setja sig í spor annarra.“

Hann segir að erlendar rannsóknir bendi til þess að börn brjóti aftur af sér í fimm til sjö prósentum tilfella.