Vaxtaverkir, formlegheit og ný forysta

Það voru um sjötíu manns samankomnir á aðalfundi Bjartrar Framtíðar á laugardag, sem haldinn var í íburðarmiklu húsnæði Officera klúbbsins á Ásbrú í Reykjanesbæ. Fundurinn var þó nokkuð í fjölmiðlum síðustu vikur enda fyrirséð að á honum yrði breytt um forystu í einu og öllu.

Fyrir utan formannskjör voru hefðbundin aðalfundarstörf á dagskránni. Einhver hafð orð á því að formlegheitin væru ívið meiri en tíðkast hefði í Besta flokknum. Þetta liti allt miklu meira út eins og fundur hjá alvöru stjórnmálaflokki. Orðið vaxtaverkir kom fyrir hjá öllum sem minntust á fylgisvandræðin. Það er sérstök orðnotkun í síminnkandi flokki.

Fráfarandi formaður flokksins, Guðmundur Steingrímsson, ávarpaði fundinn í upphafi. Hann ræddi ekki um fylgishrun flokksins, né það að hann væri að láta af embætti. Ræða hans snerist í einu og öllu um að kveða í kútinn gagnrýnisraddir sem segja að flokkurinn hafi enga stefnu. Og vitnaði hann í félaga sinn Óttarr Proppé. „Við erum íkornarnir sem dansa á trjátoppunum. Við hvíslum þegar aðrir öskra.“

Þegar Óttarr Proppé þingmaður tilkynnti um framboð sitt varð ekkert úr framboði annarra sem voru orðaðir við embættið.

„Ég hef ekki þannig séð metnað fyrir því að gegna embætti og vera formaður en ég fann til ábyrgðar og þess að ég hefði eitthvað til málanna að leggja. Ég átti ekki von á öðru en að fleiri myndu bjóða sig fram.“ Hann segir ekki málefnaágreining innan flokksins. Þó sé viðbúið að einhver áherslubreyting verði með nýjum formanni. Þeir Guðmundur séu ólíkir menn en sammála.

Óttarr með víðtækari skírskotun

„Ég hugsa að miðað við þá stöðu sem upp var komin þá hafi þetta verið klókasta niðurstaða flokksins," segir Eiríkur Bergmann, prófessor í stjórnmálafræði við háskólann á Bifröst, um formannsskipti Bjartrar framtíðar.

Aðspurður hvort hann telji að ný forysta muni hífa fylgi flokksins upp segir hann: „Við vitum það auðvitað ekki enn þá en ég hugsa að Óttarr Proppé hafi töluvert víðtækari skírskotun en flestir aðrir stjórnmálamenn í landinu. Það sem maður á aðeins eftir að átta sig á er hversu nálægt Pírötum hans fylgi liggur.

Hvort að hann fari hugsanlega að höggva í þær raðir núna. Hvort honum tækist að laða til sín eitthvað af því fylgi sem núna streymir til Píratanna í krafti þess að vera ekki hefðbundinn stjórnmálamaður og í krafti þess að koma úr pönkhreyfingunni." 

Heilbrigðismál eru heita kartaflan

Heilbrigðisstefna Bjartrar framtíðar var samþykkt á fundinum. Einkavæðing heilbrigðisþjónustu var hitamál fundarins. Í nýrri heilbrigðisstefnu flokksins kemur fram að Björt framtíð styðji fjölbreytni í rekstri heilbrigðisþjónustu.

Sigrún Gunnarsdóttir, sem kynnti stefnuna, tók fram að hún myndi ekki finna sig í flokki sem vildi takmarka einkaframtak. Önnur sjónarmið heyrðust líka. Ein kona lýsti því yfir að sér þætti erfitt að tala fyrir einkavæðingu. Önnur að einkavædd heilbrigðisþjónusta myndi rífa í sundur kerfi sem annars gæti unnið vel saman.

Þá lýsti karlmaður því yfir að flokkurinn ætti ekki að velta því fyrir sér hvort einhver væri að græða á þjónustunni. Ef einhver gæti veitt þjónustuna fyrir minni pening en hið opinbera þá ætti að nýta sér það.

Kona, með reynslu af heilbrigðiskerfinu, sagði að hættan við einkavæðingu væri að þá yrði það tekið út sem væri auðvelt og aðgengilegt en opinbera kerfið skilið eftir með erfiða og þunga ummönnun. Það gerði vinnuaðstæður heilbrigðisstarfsfólks mun verri.

Stjórnarformaður og formaður jafnvæg

"Ég lít á þetta sem átaksverkefni til eins árs til að snúa við skipinu," segir Brynhildur S. Björnsdóttir nýkjörinn stjórnarformaður Bjartrar framtíðar. Brynhildur bar sigur úr býtum í kosningunni með 61 prósent atkvæða. Hún hafði áður boðið sig fram til sama embættis en þá tapað fyrir Margréti Marteinsdóttur.

"Við þurfum að hafa andlegan og pólitískan leiðtoga og það er mín trú að Óttarr Proppé sé hann. En svo þarf skipulagsfríkið og þar kem ég sterk inn."

Brynhildur er fyrsti varaþingmaður í Reykjavíkurkjördæmi suður. Hún segist ekki hugsa sér að sitja í meira en eitt ár. Snúa þurfi fylgistapinu við. "Það verður að gera það. Kjósendur segja það og þeir hafa rétt fyrir sér."