100 milljónir í tækjakaup á heilbrigðisstofnunum úti á landi

Kristján Þór Júlíusson heilbrigðisráðherra hefur úthlutað heilbrigðisstofnunum á landsbyggðinni rúmum 100 milljónum króna til tækjakaupa.

Í tilkynningu frá velferðarráðuneytinu segir að við fjárlagagerð ársins 2015 hafi verið ákveðið að auka tímabundið fjárveitingu til tækjakaupa á heilbrigðisstofnunum á landsbyggðinni. „Aukningin nam 100 milljónum króna. Fénu hefur nú verið úthlutað að höfðu samráði við forstöðumenn viðkomandi stofnana sem gerðu ráðuneytinu grein fyrir þeim búnaði sem þeir teldu brýnast að kaupa, auk þess sem tillit var tekið til rekstrarumfangs viðkomandi stofnana.“

Framlögin skiptast milli stofnananna á eftirfarandi hátt:

Heilbrigðisstofnun Vesturlands: 18 milljónir króna

Heilbrigðisstofnun Vestfjarða: 10 milljónir króna

Heilbrigðisstofnun Norðurlands: 20 milljórnir króna

Heilbrigðisstofnun Austurlands: 15 milljónir króna

Heilbrigðisstofnun Suðurlands: 20 milljónir króna

Heilbrigðisstofnun Suðurnesja: 18 milljónir króna

Kristján Þór segir þetta aukna framlag vegna tækjakaupa til heilbrigðisstofnana á landsbyggðinni ríma vel við þær áherslur sem lagðar voru þegar gerð var fjögurra ára áætlun 2014 – 2017 um aukin framlög til tækjakaupa á Landspítalanum og Sjúkrahúsinu á Akureyri. „Ár frá ári er verið að auka framlög til mikilvægra verkefna á sviði heilbrigðismála og efla og styrkja þjónustu heilbrigðiskerfisins um all land.“