Hrósar Kim Davis fyrir hugrekki og hvetur áfram

Páfagarður Frans páfi er greinilega mikið ólíkindatól. Nú berast fréttir af því að í Bandaríkjaheimsókn sinni hafi hann meðal annars átt fund með Kim Davis, fulltrúanum á sýsluskrifstofu í smábæ í Kentucky, sem af trúarlegum ástæðum neitaði að gefa saman samkynhneigð pör.

Hún sat fimm daga í fangelsi fyrir vikið, en hún segir að páfi hafi hrósað sér fyrir hugrekkið og sagt henni að sýna styrk áfram.

Þá fer hann ófögrum orðum um Ignazio Marino, borgarstjórann í Róm, sem hefur vakið athygli fyrir stuðning sinn við hjónabönd samkynhneigðra og líknardráp.

„Hann þykist vera kaþólskur, það kom yfir hann allt í einu. Það gerist ekki þannig,“ sagði Frans páfi við blaðamenn.

Þá sagðist hann alls ekki hafa boðið borgarstjóranum að taka þátt í samkomu í Philadelphiu, sem borgarstjórinn segist hafa notað meðal annars til þess að safna fé til uppbyggingar í Rómarborg.

Þetta segir páfi eftir að hafa ítrekað boðað kærleika og miskunnsemi gagnvart öllum sem standast ekki ströngustu kröfur trúarinnar, og meðal annars talað óhræddur yfir hausamótunum á bandarískum ráðamönnum í heimsókn sinni þangað, hvatt þá til að taka opnum örmum á móti flóttafólki og innflytjendum, hætta vopnasölu og afnema dauðarefsingu.

Sýslufulltrúinn Kim Davis segir, í yfirlýsingu sem hún sendi frá sér, að hún hafi aldrei átt von á því að hitta páfa. Hann hafi hins vegar verið vinsamlegur, sýnt sér einlæga umhyggju og verið mjög persónulegur.