Flugeldar á Íslandi sprengja ESB-reglur

Herdís Storgaard, verkefnisstjóri um slysavarnir barna hjá Miðstöð um slysavarnir barna, segir að stærstu flugeldarnir sem seldir eru hérlendis séu of stórir og hættulegir almenningi.

Um áramótin sprakk skotkaka, af gerðinni Þrumur Surts, í heild sinni á jörðu niðri og olli talsverðu tjóni á húsum í Bergstaðastræti.

„Stærstu terturnar eru allt að 25 kílógrömm og það er of mikið magn af púðri,“ segir Herdís. Ekki hefði þurft að spyrja að leikslokum hefði skotkakan sem olli skemmdum í Bergstaðastræti sprungið nálægt hópi af fólki.

Reglugerð sú sem nú sé í gildi sé úr sér gengin og eftirliti með geymslu og sölu flugelda sé mjög ábótavant. Þó sé skipan mála mun betri en hún var fyrir fáeinum árum en betur megi ef duga skal.

„Á undanförnum árum hefur sá hópur sem verður fyrir slysum tekið breytingum,“ segir Herdís. Áður fyrr hafi það að stærstum hluta verið unglingar sem voru að fikta með flugeldana en nú sé meira um það að fullorðnir slasist.

„Verði slys vegna notkunar flugelda þá þyrfti að skrá það mun nánar. Komi í kjölfarið upp grunur um að galli gæti leynst í einhverri vörunni þá væri hægt að koma skilaboðum áleiðis til fólks svo það viti af honum eða í það minnsta af möguleikanum,“ segir Herdís. 

„Það er alltaf hætta og möguleiki á að þetta geti gerst,“ segir Lúðvík Georgsson, talsmaður KR flugelda. Fyrirtækið flutti umrædda skotköku til landsins og hefur haft samband við tryggingafélag sitt vegna málsins.

„Lögreglan athugar hvort flugeldar sem eru til sölu standist ekki reglugerð og slökkviliðið metur hvort eldvarnir í sölu- og geymsluplássum séu ekki til fyrirmyndar,“ segir Lúðvík og bætir við að ólíklegt sé að flugeldar verði fyrir hnjaski á leið til landsins. Aðeins örfáar hafnir í heiminum hleypi flugeldum í gegn hjá sér og þær taki það hlutverk föstum tökum.

„Hérlendis höfum við leyft stærri flugelda en nágrannalöndin og er hægt að rökræða fram og til baka hve stóra flugelda eigi að leyfa,“ segir Lúðvík. Það sé enn fremur ljóst að flugeldar á íslenskum markaði verði öllu minni verði íslensk lög samræmd reglum Evrópusambandsins.

Lúðvík segir að menn verði að fara varlega með skotelda sökum eðlis vörunnar. Sé fyllstu varúðar hins vegar gætt eigi áramótin að geta farið slysalaust fram þó að stöku flugeldur sé gallaður.

Ekki náðist í starfsfólk innanríkisráðuneytisins við vinnslu fréttarinnar