Óvægin ummæli vegna meints eineltis á Ísafirði

Jóna Benediktsdóttir, aðstoðarskólastjóri Grunnskólans á Ísafirði, harmar umræðu á netmiðlum og víðar eftir að frásögn af meintu einelti meðal nemenda skólans vakti mikla athygli um helgina. Jóna segir að frásögnin sé ósönn með öllu og telur að hugsa þurfi betur um hvernig talað er um svona mál þar sem börn eiga í hlut.

Málið byggt á misskilningi

Facebook-færsla íbúa á Ísafirði, sem sagði að hópur drengja í tíunda bekk skólans hefði sniðgengið afmælisboð jafnaldra þeirra, vakti mikla athygli og var meðal annars fjallað um málið í netmiðlum. Jóna segir að ekkert slíkt hafi verið í gangi og að afmælisbarnið og móðir hans hafi tekið málið mjög nærri sér.

„Mamma drengsins er búin að koma og halda fund með foreldrum barnanna í bekknum, því allir voru bara miður sín yfir þessu,“ segir Jóna. Hún segir málið allt byggt á misskilningi.

Drengurinn hafi nefnt við nokkra vini sína að hann væri með opið hús vegna afmælis síns en bara tveir hafi boðað komu sína. Að sögn Jónu varð annar drengurinn svo veikur en hinn hélt fyrir misskilning að afmælisbarnið væri veikt. Hún segir að ekkert ósætti sé á milli drengjanna.

„Hinsvegar er það þannig, eins og hlutir gerast stundum, að mamman segir við frænku sína að hann hafi boðið nokkrum strákum en enginn hafi komið,“ segir hún. „Frænkan verður rosalega reið og segir manninum sínum þetta, sem síðan setur inn þessa færslu. Svona gerast hlutir, það myndast keðja af fólki þar til einn segir, þetta er agalegt.“

Sagt að setja ætti drengina í gasklefa

Málið vakti sem fyrr segir mikla athygli og segir Jóna að ummæli um málið í athugasemdakerfum netmiðla hafi gengið fram af henni.

„Það er bara dapurlegt,“ segir hún. „Krakkarnir okkar upplifðu það allt, sumir sögðu að það ætti bara að setja þá í gasklefa og svona. Þeir voru alveg miður sín.“

Hún segir að taka eigi tillit til þess að aðeins sé um börn að ræða, burtséð frá því að í þessu tilviki hafi hvorteð er verið um misskilning að ræða.

„Okkur í skólanum er svolítið illa við að flokka börn í þessa hópa, þolendur og gerendur. Allt eru þetta börn og það er þannig að börn hugsa ekki alltaf um hvernig öðrum líður þegar þau gera eitthvað. Mér finnst þess vegna svo leiðinlegt að börn séu dæmd svona grimmt fyrir hegðun sína. Við þurfum kannski að hugsa um hvernig við tölum um svona mál.“