Felix Bergsson saknar leðurhommaklúbbsins

Ítarleg umfjöllun er um skemmtanalífið í Reykjavík, þá með augum homma, í fjölmiðlinum gayiceland.is. Hún er undir yfirskriftinni „There is no true gay scene in Iceland“ og það er blaðamaðurinn Friðrika Benónýs sem tekur saman.

MSC klúbbsins sárt saknað

Umfjöllunin er athyglisverð, fjallar um menningu sem ekki hefur farið hátt á Íslandi og er fyrirsögnin lýsandi fyrir efni greinarinnar: Af hverju er ekkert almennilegt skemmtanalíf sem ætlað er hommum sérstaklega? Friðrika bendir á að á Facebook hafi að undanförnu mátt lesa minningar fullar trega og eftirsjár um MSC men unly club, leðurhommaklúbb sem rekinn var á árum áður við Ingólfsstræti. Og hún ræðir við einn þeirra sem sótti staðinn reglulega, Felix Bergsson sjónvarpsmann og leikara, sem segir staðinn þann vera frábæran. Og hann eigi þaðan góðar minningar.

„Ég fór tók að sækja staðinn meðan hann var lítill og staðsettur gegnt Íslensku óperunni. Seinna flutti hann í kjallara við Laugaveginn, í stærra rými og vel skreytt. Þar var eingöngu karlmönnum hleypt inn og þeir sem vildu mæta með kvenfólki fengu ekki inngöngu,“ segir Felix í viðtalinu.

Leður og gallabuxur

Áhersla var lögð á ímynd karlmennsku, þetta var nánast leikhús. Menn klæddu sig upp áður en þeir sóttu staðinn, í leður og gallabuxur og sýndu sig. „Það var frábært að sitja við barinn og fylgjast með öllu því leikræna sem átti sér stað.“

Friðrika spyr Felix út í orðróm þess efnis að staðurinn hafi verið hættulegur. Felix hlær en segir að það hafi verið partur af ímyndinni. „MSC var ætlað að vera staður sem fólk hvíslaðist á um og óttaðist að sækja. Það var hluti spennunnar. Menn gátu ekki mætt í venjulegum jakkafötum eða diskóklæðnaði; þarna var karlmennskan í hávegum höfð. Kannski var það hluti vandans, ungir menn einfaldlega þorðu ekki að sækja staðinn eftir að hafa heyrt orðróminn?“

Felix telur einsýnt að það vanti sárlega skemmtistað í Reykjavík sem eingöngu er ætlaður samkynhneigðum karlmönnum.

Í greininni er svo sagt frá tilurð staðarins fornfræga, MSC standi fyrir Motor Sports Club og til hans hafi verið stofnað 1985 af mönnum sem kynnst höfðu sambærilegum stöðum „hinu leðraða lífi“ í útlöndum.