Sterling til í að færa sig fyrir Rooney

Raheem Sterling segist vera tilbúinn að spila í hvaða stöðu sem er með enska landsliðinu.

Sterling spilaði sem sóknartengiliður í 2-1 tapi enska liðsins gegn Ítalíu og þótti standa sig vel. Wayne Rooney hóf leikinn á vinstri kantinum og þó svo að hann hafi lagt upp mark Englands var hann gagnrýndur fyrir frammistöðu sína.

England mætir Úrúgvæ annað kvöld er búist við því að Rooney verði færður inn á miðjuna og Sterling út á kantinn.

„Ég skal spila í hvaða stöðu sem þjálfarinn vill. Ég mun leggja mitt af mörkum fyrir liðið hvar sem ég spila,“ sagði Sterling í samtali við enska fjölmiðla.

Sterling mætir á morgun samherja sínum, Luis Suarez, ef sá síðarnefndi verður leikfær eftir meiðsli sem hafa verið að hrjá hann. En Sterling segir að undirbúningur enska liðsins hafi ekki aðeins miðast við Suarez.

„Við erum að reyna að finna leiðir til að koma höggi á þá og ég tel að þjálfarinn hafi undirbúið okkur mjög vel fyrir þennan leik.“