„Þetta skipulag mun auðsjáanlega rýra lífsgæði okkar“

Íbúar við Grettisgötu ætla efna til samstöðufundar í dag klukkan tvö undir yfirskriftinni „Stoppum framkvæmdir við Grettisgötu 17“.

Íbúarnir ætla að standa vörð um rúmlega hundrað ára gamlan silfurreyni á Grettisgötu 17 sem á að fella ef áætlanir um hótelbyggingu ná fram að ganga. Athugasemdir mótmælenda bárust í gríð og erg til fulltrúa borgaryfirvalda í síðustu viku og var þá ákveðið að fara yfir stöðu mála.

„Nú á að fella eldgamlan, stóran og tignarlegan silfurreyni sem stendur við Grettisgötu 17 og einnig færa húsið sem þar stendur en það er friðað og mun ólíklega þola að vera fært. Húsið á að færa þannig að það stendur alveg ofan í garðinum að Grettisgötu 13 og skyggir þar með á alla sólarglætu í garðinum,“ segir á vefsíðu samstöðuhópsins.

Þar kemur einnig fram að ofan á allt eigi að byggja hótel sem muni teygja sig frá Laugavegi og upp að Grettisgötu með tilheyrandi rútustoppum og óþægindum fyrir alla íbúa í nágrenni við reitinn.

„Einnig á að gera göngustíg að hótelinu frá Grettisgötu sem liggur alveg ofan í íbúum. Engin grenndarkynning var gerð áður en teikningar voru samþykktar en skipulagsbreytingarnar voru aðeins auglýstar í Fréttablaðinu og það á Þorláksmessu. Aðeins nýlega fréttum við nágrannarnir af þessu og margir fréttu að þessu fyrst í dag. Þetta skipulag mun auðsjáanlega rýra lífsgæði okkar.“

Vegna fyrirhugaðrar byggingar hótels við Laugaveg þarf að færa til húsið á Grettisgötu 17 og fella 106 ára gamalt silfurreynistré sem stendur á lóðinni, og íbúum við Grettisgötu þykir fallegt. Auk þess mun húsið skyggja á sólarljós á nærliggjandi lóð þegar það hefur verið fært.