Íbúarnir ætla að standa vörð um 100 ára silfurreyni

Skipulagsstjóri, garðyrkjustjóri og fulltrúi Lantan ehf., sem hyggst reisa hótel milli Laugavegs og Grettisgötu, funduðu í gær vegna mótmæla íbúa í grenndinni. Íbúarnir ætla að standa vörð um rúmlega hundrað ára gamlan silfurreyni á Grettisgötu 17 sem á að fella ef áætlanir um hótelbyggingu ná fram að ganga. Athugasemdir mótmælenda bárust í gríð og erg til fulltrúa borgaryfirvalda í gær og var þá ákveðið að fara yfir stöðu mála.

„Þetta er flott tré og getur sjálfsagt lifað í önnur 100 ár. Ég myndi fagna því ef leitað yrði lausna svo tréð fái að vera,“ segir Þórólfur Jónsson garðyrkjustjóri.

Hann segir að reglur um friðun trjáa vegna aldurs og hæðar eigi ekki við þegar búið sé að samþykkja byggingar á svæði sem þau standa á. Hann getur þess að enn hafi ekki verið sótt um byggingarleyfi.

Íbúarnir eru ekki bara ósáttir við að missa silfurreyninn heldur eru þeir einnig mótfallnir hótelbyggingunni og lagningu stígs frá Grettisgötu að Laugavegi. Þeir segja að mikið ónæði komi til með að fylgja ferðum hótelgesta þar.

Auglýsing um tillögu að breyttu deiliskipulagi var birt í fjölmiðlum á Þorláksmessu til þess að hægt væri að gera athugasemdir. „Hver rekur augun í slíka auglýsingu á þeim degi?“ spyr Hallfríður Pálsdóttir, sem býr að Grettisgötu 13 eða við hliðina á fyrirhuguðum stíg. Íbúarnir hafa kvartað undan því að engin grenndarkynning hafi farið fram.

Björn Axelsson skipulagsstjóri segir grenndarkynningu fara fram þegar um minniháttar breytingar er að ræða. „Það er til dæmis gert þegar um breytingar á kvistum er að ræða eða þegar ekki er til deiliskipulag. Þegar um deiliskipulag er að ræða er ekki komið með bréf inn um lúguna heldur er birt auglýsing.“ Skipulagsstjóri segir ástæðu til að ræða möguleikann á breyttu ferli kynninga vegna breytinga á skipulagi í þéttri byggð.

Samkvæmt tillögu að breyttu deiliskipulagi fyrir lóðirnar við Laugaveg 34A og 36 og Grettisgötu 17 er gert ráð fyrir að bakhúsið við Laugaveg 34A verði stækkað til suðurs að lóðarmörkum Grettisgötu 17 og byggt þar ofan á stakstætt tveggja hæða hús með risi og kvistum á þaki. Við Laugaveg 36 er hugmyndin að byggja tveggja hæða staka byggingu með risi og kvistum.

Minjastofnun hefur fallist á að hús á baklóð Laugavegar 36 verði fært yfir á lóð við Grettisgötu 17. Minjastofnun hefur einnig fallist á að húsið á Grettisgötu 17 verði flutt innan lóðarinnar og því verði fundinn staður framar við götu. „Þetta skipulag sem nú liggur fyrir er framför frá því sem búið var að leyfa 2003. Það er sérstaklega ánægjulegt að húsið á baklóð Laugavegs, sem var byggt 1896, verði áfram hluti af hinni upphaflegu timburhúsabyggð,“ segir Pétur Ármannsson, forstöðumaður Minjastofnunar.

Hann segir að ekki hafi verið tekin afstaða til silfurreynisins við Grettisgötu 17. „Auðvitað er trjágróður hluti af grónu umhverfi. Í þessu tilfelli litum við kannski frekar á að þetta væri viðfangsefni borgarinnar. Verndun trjágróðurs er ekki hluti af lögum um menningarminjar sem við störfum eftir.“