Reynsluleysið gæti hjálpað

Reynsluleysi yngri leikmanna enska landsliðsins gæti hjálpað liðinu að mati Jordan Henderson. Ungt lið Englands ætti ekki að óttast neinn á Heimsmeistaramótinu.

Roy Hodgson vakti athygli þegar hann ákvað að taka nokkra unga leikmenn með til Brasilíu. Raheem Sterling, Ross Barkley, Daniel Sturridge og Luke Shaw eru allir á sínu fyrsta stórmóti.

„Yngri leikmennirnir sem eru að taka þátt í stórmóti í fyrsta sinn óttast ekkert og það er jákvætt. Sterling, Barkley og Shaw komu inn í hópinn og hafa staðið sig frábærlega á æfingunum og í æfingarleikjum.“

Henderson gerði lítið úr áhyggjum enskra miðla að leikurinn færi fram í Manaus sem er í miðjum Amazon frumskóginum.

„Það er erfiðara að spila í hitanum en við getum ekki pælt í því. Við höfum undirbúið þetta í Miami, Portúgal og núna í Brasilíu,“ sagði Henderson.

Stöð 2 Sport 2 verður með 18 leiki í beinni frá HM í Brasilíu, þar af alla leiki Arons Jóhannssonar. Gummi Ben verður svo með HM-messu þar sem sérfræðingar fara yfir leiki dagsins og hita upp fyrir leik kvöldsins.

Kynntu þér málið nánar á 365.is.