Ragnar ónotaður varamaður hjá Krasnodar

Ragnar Sigurðsson missti af sínum fyrstu mínútum í rússnesku úrvalsdeildinni á tímabilinu er lið hans, Krasnodar, vann Terek Grozny, 2-0, á heimavelli.

Ragnar hafði spilað alla tíu deildarleiki Krasnodar á tímabilinu til þessa fyrir leikinn í dag en í þetta sinn var hann ónotaður varamaður.

Krasnodar komst upp í þriðja sæti deildarinnar með sigrinum og er nú með 21 stig, einu meira en Kuban Krasnodar. Zenit og CSKA Moskva eru í efstu sætunum með 29 og 25 stig.

Ragnar skoraði sitt fyrsta deildarmark í Rússlandi er Krasnodar gerði jafntefli við topplið Zenit, 2-2, í síðustu umferð.