„Háhýsið virkilega vond hugmynd“

„Háhýsið sem nú stendur til að reisa neðst við Skúlagötu í Skuggahverfinu er virkilega vond hugmynd,“ segir Líf Magneudóttir, sem skipar 2. sæti á lista VG fyrir komandi sveitarstjórnarkosningar í Reykjavík.

Framkvæmdir við minni turn af tveimur sem eiga að rísa við Lindargötu 39 og Skúlagötu 22 eru hafnar en háhýsið mun breyta götumynd Frakkastígs umtalsvert og skyggja á útsýni frá Skólavörðuholti niður götuna að sjónum.

Líf segir jafnframt að þegar nýjar byggingar eru samþykktar þá verði að taka tillit til byggðar sem fyrir er. Hún segir að þó svo það sé mikilvægt að þétta byggð í Reykjavík, þá megi það ekki ganga á lífsgæði sem fyrir búa í borginni.

„Þéttingu byggðar má ekki kaupa á hvaða verði sem er,“ segir Líf.

Engar athugasemdir bárust þegar unnið var að gerð nýs deiliskipulags og segir hún ástæðuna augljósa, umsagnarferlið virki ekki. Þá veltir hún því fyrir sér hvernig hægt væri að leysa málið.

„Maður veit best hvað er í gangi í sínu hverfi. Það væri hægt að auka samtöl við íbúasamtök, nýta netið betur og bæta það ferli sem fer af stað þegar kallað er eftir athugasemdum.“

Líf segir þó enga töfralausn vera í málinu, en segir þáttöku íbúa í ákvarðanatökum á vettvangi borgarinnar skref í rétta átt. Þá telur hún nauðsynlegt að efla hverfisráðin og tryggja að þau séu virkur öryggisventill og jafnvel að viðamikil skipulagsmál fari í víðtæka íbúakosningu.

„Skipulagsslysin verða ekki aftur tekin. Skipulagsráð verður að hafa skýra sýn í skipulagsmálum, verður að setja hag okkar, íbúanna í fyrsta sæti og láta ekki spila með sig.“