Gætu þurft að flýja hitann í Vaðlaheiðargöngum

Verktakar í Vaðlaheiðargöngum skoða að hætta gangagerð í Eyjafirði. Ekki hefur náðst að loka heitavatnssprungunni sem opnaðist í vetur og starfsmenn eiga erfitt með að vinna fullan vinnudag sökum hitans.

„Við erum búin að stytta vaktirnar til að létta á mannskapnum og gefa meira svigrúm fyrir pásur. Við höfum alls ekkert ýtt á mannskapinn heldur unnið með honum því menn gefast upp þegar þrýst er á þá í svona aðstæðum,“ segir Einar Hrafn Hjálmarsson, staðarstjóri Ósafls í Vaðlaheiðargöngum.

Vatnið veldur því að hitastigið í göngunum er milli 28 og 30 gráður. Í lok júní var reynt að loka sprungunni en þá minnkaði vatnsflæðið einungis úr 380 lítrum á sekúndu í 200 lítra. Ljóst er að henni verður ekki lokað á næstu vikum. Því er í skoðun að færa mannskap og tæki yfir í Fnjóskadal, þar sem hinn endi ganganna verður.

„Vatnið hefur seinkað verkinu um nokkrar vikur. Það er þó enn á áætlun því þetta gekk svo vel í byrjun og við höfum verið að vinna alla daga,“ segir Einar.

Valgeir Bergmann, framkvæmdastjóri Vaðlaheiðarganga hf., segir göngin hafa lengst um fimm metra á þeim tveimur vikum sem fóru í tilraunina við að loka sprungunni. Áður en hún opnaðist lengdust þau að meðaltali um 60–70 metra á viku.

„Það er búið að setja um sex tonn af efnaþéttingu í sprunguna en nú er ljóst að það þarf talsvert meira. Menn eru því að endurmeta stöðuna,“ segir Valgeir.

Upphafleg verkáætlun gerði ráð fyrir tveimur borhópum og að sprengingar myndu hefjast í Fnjóskadal í júní. Um síðustu áramót var ákveðið að hætta við þau áform vegna þess hversu mikil afköstin voru Eyjafjarðarmegin.

„Það væri skynsamlegra að flytja borinn yfir í Fnjóskadal og byrja þar strax. Þar væri hægt að vinna fullar vaktir og það er mikilvægt að komast inn í fjallið þeim megin áður en frystir í vetur. Borinn yrði þá fluttur yfir um miðjan ágúst,“ segir Valgeir.

Hann segist ekki vita hvað sprungan hafi kostað hingað til.

„Þau mál eru enn í skoðun og við vitum ekki hversu mikinn efnagraut við þurfum til viðbótar til að loka henni. Heildarupphæðin liggur því ekki fyrir.“