Fangar á Kvíabryggju bjarga konu úr bílavandræðum

„Þeir voru alveg yndislegir,“ segir Heiðrún Hreiðarsdóttir mannfræðingur um fangana á Kvíabryggju sem komu henni til aðstoðar síðastliðinn laugardag. Heiðrún hafði verið að heimsækja fanga á Kvíabryggju  en þegar hún ætlaði að leggja af stað heim til Reykjavíkur, lenti hún í meiriháttar vandræðum með bíl sinn og buðu fangarnir fram aðstoð sína við að koma henni af stað.

Komu bílnum í gang með póstkassalykli

„Bíllykillinn beyglaðist hjá mér,“ segir Heiðrún. „Þannig að þeir stukku strax tveir til og réttu hann af. En hann virkaði samt ekkert.“

Í tvær eða þrjár klukkustundir á eftir, reyndu fangarnir hvað þeir gátu til að setja bílinn í gang. Svo fór að lykill Heiðrúnar brotnaði í kveikjulás bílsins.

„Þá fóru þeir í svaka prógramm og fundu einhverja leið til að kveikja á bílnum,“ segir hún. Hún segir að hjálparhellurnar hafi á endanum notað póstkassalykil hennar til að setja bílinn í gang í gegnum kassa undir mælaborðinu. Þannig gat hún keyrt af stað með brotinn bíllykilinn í lásnum.

Sjálfsagt hafa lesendur séð atriði úr kvikmyndum þar sem glæponar „tengja framhjá“ til að kveikja á bifreið á örskotsstundu án bíllykils. Heiðrún segir þó að fangarnir sem aðstoðuðu hana hafi ekki litið út fyrir að búa yfir sérkunnáttu á þessu sviði.

„Þeir voru heillengi að þessu,“ segir hún. „Við gerðum smá grín að þeim, að þeir ættu nú ekki heima þarna fyrst þeir væru ekki færari en þetta. Ég get ekki ímyndað mér annað en að ef þeir væru að þessu á götunni, yrðu þeir „böstaðir.““ Hún ítrekar þó að hún vilji ekki gera lítið úr afreki mannanna, enda um mikið verk að ræða.

Föst í fangelsi með sex ára dóttur

Sjaldan er ein báran stök og þegar það loksins tókst að koma bílnum í gang, kom í ljós að læsing var á stýrinu. Þannig var aðeins hægt að aka fram og til baka. Eftir nokkurra klukkustunda bið segist Heiðrún hafa verið orðið nokkuð stressuð, enda með sex ára dóttur sína í för.

„Ég var farin að halda að ég þyrfti að láta sækja mig úr bænum,“ segir Heiðrún. „Þeim fannst það góð hugmynd að ég myndi gista þarna en ég var ekki alveg sammála því.“

Svo fór að fangarnir þurftu að brjóta læsinguna á stýrinu þannig að Heiðrún kæmist heim með dóttur sína. Allt fór þannig vel að lokum, þó að bíllykillinn sitji enn fastur í kveikilásnum.

„Ég hef ekki komið mér í að fara með bílinn í viðgerð,“ segir Heiðrún. „En hann svínvirkar.“