Sjálfboðaliðar mæta í skólana

Flestir grunnskólar landsins hafa nýtt sér boð Rauða krossins á Íslandi um kennslu í skyndihjálp. Rauði krossinn fagnar 90 ára afmæli sínu með áherslu á skyndihjálp.

Gunnhildur Sveinsdóttir, verkefnastjóri skyndihjálpar, segir mikilvægt að kenna börnum skyndihjálp. „Þetta er risavaxið verkefni sem tugir sjálfboðaliða komu að. Meðal annars fjöldi hjúkrunar- og læknanema,“ segir hún. Nú þegar hafi flestir skólar á höfuðborgarsvæðinu verið heimsóttir auk fjölmargra úti á landi.

„Krakkarnir hafa mikinn áhuga á skyndihjálp. Ég fór í heimsókn í einn skóla og þar fékk maður að heyra margar skemmtilegar hrakfalla- og slysasögur. Krakkarnir eru síðan sendiherrar á sínum heimilum og tala um það sem þeim finnst áhugavert,“ segir Gunnhildur.