Mynd um afrekið í Vöðlavík

Þórarinn Hávarðsson kvikmyndagerðarmaður vinnur nú að gerð heimildarmyndar um björgunarafrekið í Vöðlavík fyrir 20 árum. Í janúar 1994 björguðu áhafnir tveggja þyrlna björgunarsveita varnarliðsins sex skipverjum af brúarþaki björgunarskipsins Goðans, sem var strandað og hálfsokkið. Einn maður fórst í slysinu.

Fjöldi íslenskra björgunarsveitarmanna kom einnig að björguninni. Afrekið var umtalað og krafan um að þyrlukostur Landhelgisgæslunnar yrði bættur jókst mjög eftir það. Úr varð að Super Puma þyrlan TF-LÍF kom ári síðar til landsins.

Þórarinn var kvikmyndatökumaður á fréttastofu RÚV þegar slysið varð og fylgdist vel með. Hann segist þó hafa lært enn meira við gerð myndarinnar. „Það er ýmislegt búið að koma þarna fram sem maður hafði ekki hugmynd um þó maður hafi verið á staðnum megnið af tímanum,“ segir Þórarinn. Hann kveðst hafa kostað myndina að mestu úr eigin vasa en er að leita að meira fjármagni.

„Það er hvergi til heildstæð lýsing á atburðarásinni eins og hún kom fyrir,“ segir Þórarinn um ástæður þess að hann fór út í gerð myndarinnar. Núna sé komin heildstæð lýsing á atburðarásinni með viðtölum við fjölmarga sem að málum komu. „Þó að þetta sé tuttugu árum seinna, þá er eins og menn muni eftir þessu eins og það hafi gerst í gær,“ segir hann. 

Þórarinn segist hafa átt mikið myndefni frá þessum tíma og gerð myndarinnar hafi verið ein leiðin til að nýta efnið. „Það er kannski ekki nema svona fimm prósent af því sem hafði komið fyrir sjónir fólks,“ segir Þórarinn. Það hafi því hentað mjög vel að ráðast í gerð þessarar myndar. 

Þórarinn segist hafa byrjað á gerð myndarinnar í lok síðasta árs. „Við byrjuðum á að fara yfir efni og skoða í desember,“ segir Þórarinn og bætir því við að stefnt sé á að gerð myndarinnar verði lokið í september. „Stefnan er að fara austur á Eskifjörð með myndina upp úr fimmtánda september. Þar ætlum við að sýna hana til styrktar björgunarsveitunum.“ 

Björgunarsveitirnar á Eskifirði og í Neskaupstað stóðu að því að reisa minnisvarða í Vöðlavík um björgunarafrekið í upphafi árs. Þórarinn vonast til að ágóði af myndinni nægi til þess að fjármagna gerð varðans. „En það væri ekki verra ef það kæmi meira,“ segir hann. 

Þórarinn segist jafnframt vonast til þess að björgunarsveitamenn á Austurlandi hópist að og sjái myndina í september. Óvíst sé hvort myndin verði sýnd í Reykjavík, en líklega verði gefinn út mynddiskur í lok árs með efninu.

Þórarinn vill ekki upplýsa hvað honum hafi komið mest á óvart við gerð myndarinnar. „Það kemur bara í ljós í myndinni,“ segir hann að lokum.