YouTube kemur til bjargar

Íslensk tónlistarmyndbönd hafa að undanförnu látið meira á sér bera en undanfarin ár. Til að mynda er flokkurinn Myndband ársins kominn á ný inn í Íslensku tónlistarverðlaunin. Sá flokkur kom til sögunnar árið 2001 og lifði farsælu lífi til ársins 2006 en þá var flokkurinn að ákveðnu leyti tekinn út, enda lítið af myndböndum í framleiðslu á þeim tíma.

Á árunum 2007 til 2012 voru engar tilnefningar til myndbanda ársins heldur eingöngu valið eitt myndband sem varð sigurvegari. Hins vegar kom flokkurinn á ný inn í Tónlistarverðlaunin árið 2012 og voru þá fimm myndbönd tilnefnd.

Á Hlustendaverðlaunum útvarpsstöðva 365 miðla eru tilnefningar í flokknum myndband ársins sex talsins og á Íslensku tónlistarverðlaununum eru tilnefningarnar í sama flokki fimm talsins.

„Það eru fleiri að sýna tónlistarmyndböndunum áhuga og það sést til dæmis á því að það eru fleiri tilnefningar á tónlistarverðlaununum,“ segir Magnús Leifsson leikstjóri, en hann vann verðlaunin fyrir myndband ársins á síðasta ári fyrir myndband sitt við lagið Glow með Retro Stefson.

„Þeir sem eru að gera myndböndin eru ekki að gera þau út af peningunum, en þetta er góð leið til þess að koma sér á framfæri, bæði fyrir leikstjórann og tónlistarmanninn,“ segir Magnús. Hann segir einnig að með allri tækninni og stafrænu myndavélunum sé orðið einfaldara fyrir fólk úti í bæ að búa til vel útlitandi efni sem hægt er að setja á vefinn.

„KK sextettinn kom fram í fyrsta íslenska tónlistarmyndbandinu árið 1947 en það var þó ekkert hljóð þá,“ segir Jónatan Garðarsson, tónlistarsérfræðingur og rokksögukennari, spurður út upprunann.

Mikill uppgangur var í tónlistarmyndböndum á Íslandi fram til ársins 2007. „Á árunum 2006-2007 hrynur þetta og sjónvarpsstöðin Popptíví hættir. Rétt á eftir læsir Skjár Einn sinni stöð. Þá er lítill markaður og lítill tilgangur að búa til myndbönd. Þetta breytist svo allt þegar YouTube-vefurinn verður vinsæll,“ segir Jónatan. Þá eru listamenn að setja myndböndin sín á Vimeo sem er einnig geysivinsæl síða. Einnig hafa ófá myndbönd verið frumsýnd á Vísi, líkt og til mynda tvö af þeim fimm myndböndum sem tilnefnd eru sem myndband ársins á íslensku tónlistarverðlaununum.

Nú eru íslensk nöfn í tónlistarheiminum á borð við Of Monsters and Men, Sóleyju, Árstíðir, Björk, Sigur Rós, Retro Stefson og mörg önnur geysivinsæl á YouTube og með mjög mikið áhorf.

Tilnefningar fyrir myndband ársins á Íslensku tónlistarverðlaununum

Baarregaard & Briem- Love with you

Stjórn: Harald Haraldsson

Grísalappalísa - Hver er ég?

Stjórn: Sigurður Möller Sívertsen

Ólafur Arnalds - Only the Winds

Stjórn: Harald Haraldsson

DJ. Flugvél og Geimskip - Glamúr í geimnum

Stjórn: Steinunn Harðardóttir

Úlfur - Heaven in a Wildflower

Stjórn: Máni M. Sigfússo

Myndbönd með mikið áhorf á Youtube

Björk: All is full of love - 15.869.820

Emilíana Torrini: Jungle Drum - 14.029.473

Sóley: Pretty Face - 15.687.298

Of Monsters and Men: Little Talks (Live on KEXP) - 7.340,651

Myndbönd Sóleyjar og OMAM eru ekki leikstýrð myndbönd. Sóley sýnir einungis mynd af plötuumslaginu á meðan lagið er spilað og upptaka hljómsveitarinnar Of Monsters and Men eru einfaldlega hljómsveitarmeðlimir sem sitja í stofu í hring og syngja lagið. Það má segja að myndbandið hafi verið upphafið að velgengni sveitarinnar. Þessar tölur sýna að stundum er myndbandið sjálft aukaatriði ef lagið er gott.

)