Sakar oddvita Samfylkingarinnar um að ganga gegn hagsmunum bæjarbúa

Þorkell Ásgeir Jóhannsson, flugstjóri hjá Mýflugi, sakar Loga Má Einarsson, bæjarfulltrúa Samfylkingarinnar á Akureyri og oddvita framboðs flokksins til sveitarstjórnarkosninga, um að ganga erinda flokks síns og virða að vettugi hagsmuni Akureyringa í sambandi við veru flugvallar í Vatnsmýri.

Vill hann meina að þetta hafi hann gert með því að rita ekki undirskrift sína á lista Hjartans í Vatnsmýri. Þorkell skrifaði grein í Bæjarins bestu sem birtist í gær þess efnis undir yfirskriftinni „Samtrygging innan flokka.“



„Samfylkingin í Reykjavík vinnur gegn hagsmunum landsbyggðarinnar og Logi hefur tekið afstöðu með flokknum sínum sem er aðför að flugvellinum í Reykjavík,“ segir Þorkell Jóhannsson í samtali við Vísi.

„Logi hefur gert þetta í orði og til dæmis með því að styðja ekki átak okkar Hjartans í Vatnsmýri. Þar skrifaði hann ekki undir þó honum stæði það til boða.“

„Þannig er Logi að ganga erinda flokks síns og er fylgjandi þeirri eyðileggingarstarfsemi sem á sér stað í borgarstjórn Reykjavíkur, þar af leiðir að hann er á móti hagsmunum Akureyringa í málinu sem eru meðal annars klárir öryggishagsmunir,“ segir Þorkell.

„Samfylkingin er klárlega í verki að eyðileggja þennan flugvöll án þess að bíða eftir niðurstöðu úr Rögnunefndinni svokallaðri. Við í samtökunum Hjartað í Vatnsmýri viljum flugvöll í Vatnsmýri eða á jafngóðum stað og í Vatsmýri, vandamálið er það að við sjáum ekki í hendi okkar aðra jafn góða staði eins og Vatnsmýrina“.

Logi Már Einarsson gefur lítið fyrir þess lags gífuryrði sem koma fram í grein Þorkels. 

„Þessi ummæli eru varla svara verð.  Ég er ekki, og hef aldrei sagst vera á móti flugvellinum í Vatnsmýrinni. Ég hef hins vegar verið á þeirri skoðun að mannkynið hafi margoft sýnt færni sína, þegar kemur að lausn flókinna verkefna. Þess vegna hef ég ekki útilokað aðra lausn fyrir flugvöll í Reykjavík, enda verði  hún að minnsta kosti. jafn góð fyrir alla landsmenn og núverandi flugvöllur. Þessu sjónarmiði hef ég margoft komið á framfæri  m.a. í blaðagreinum," segir Logi Már. 

„Það er að sjálfsögðu gríðarlega mikilvægt að aðgengi allra landsmanna að höfuðborginni sé gott og sjúkraflutningar eins skilvirkir og nokkur er kostur. Það er hins vegar líka bráðnauðsynlegt að Reykjavík nái að styrkjast og þróast til langrar framtíðar. Af hverju látum við þetta mál ekki vera prófstein á það hvort við getum tekist á við flókin viðfangsefni og leyst þau farsællega án gífuryrða og skætings? Viðfangsefnið ætti ekki bara að vera að halda aðstöðu til sjúkraflutninga og aðgengi að höfuðborginni óbreyttu heldur að þjónustan verði enn betri," bætir Logi Már við.

Um ástæður þess að hann hafi ekki skrifað undir lista Hjartans í Vatnsmýri segir Logi:

„Það er hins vegar rétt að ég skrifaði ekki undir þennan lista enda fannst mér menn gefa sér að núverandi fyrirkomulag Reykjavíkurflugvallar vera  besti kosturinn um alla framtíð.  Ég er ekki sannfærður um það.  Þess vegna á að gefa Rögnunefndinni umsamið svigrúm til þess að finna lausn sem hámarkar ávinning allra landsmanna. Á meðan sú lausn er ekki fundin á flugvöllurinn að sjálfsögðu ekki að víkja úr Vatnsmýrinni."



Allar fréttir af sveitarstjórnarkosningunum 2014 má nálgast á Kosningavef Vísis, visir.is/kosningar