„Íslendingar munu aldrei byggja nýjan flugvöll“

„Íslendingar munu aldrei byggja nýjan flugvöll, það er bara þannig,“ sagði Elín Árnadóttir, aðstoðarforstjóri Isavia, á fundi Sjálfstæðisflokksins á Akureyri í kvöld, um framtíð Reykjavíkurflugvallar og stöðu innanlandsflugsins.

„Kostnaðurinn við að byggja og reka flugvöll er það mikill að það er algjörlega ljóst, af okkar hálfu, að ef Reykjavíkurflugvöllur verður lagður af mun starfsemin öll flytjast til Keflavíkur.“

Hún segir Reykjavíkurborg ekki hafa neina heimild til að að loka brautum á Reykjavíkurflugvelli.

Elín var frummælandi á fundinum auk Njáls Trausta Friðbertssonar, varabæjarfulltrúa á Akureyri og formanns Hjartans í Vatnsmýri.

Njáll Trausti sagði í máli sínu að flugvöllur í Vatnsmýri væri spurning um líf eða dauða fyrir íbúa landsbyggðarinnar. Nærri helmingur alls sjúkraflugs innihéldi sjúkling í lífshættu og skipti því miklu máli að vera sem næst landspítala.

Njáll gaf lítið fyrir þá hugmynd að flytja miðstöð innanlandsflugs til Keflavíkur og tengja Keflavíkurflugvöll og miðbæ Reykjavíkur með hraðlestarkerfi. Benti hann á, máli sínu til stuðnings, að hraðlest myndi kosta um 250 milljarða króna og sú fjárfesting myndi aldrei standa undir sér.

Njáll Trausti benti einnig á að 73 prósent borgarfulltrúa byggju í póstnúmerum 101 og 107 í Reykjavík, á móti búa 73 prósent Reykvíkinga utan þessara hverfa. Vill Njáll Trausti meina að ef búseta borgarfulltrúa í Reykjavík væri jafnari og dreifðari um borgina væri andstaðan við flugvöllinn innan borgarstjórnar mun minni.

Á fundinum kom fram einörð afstaða Sjálfstæðismanna á Akureyri fyrir því að halda flugvellinum í Vatnsmýri, það væri afar slæmt fyrir landsbyggðina ef flugvöllurinn færi.