Valencia afgreiddi Hondúras

Markahrókurinn Enner Valencia sá til þess að Ekvador á enn möguleika á því að komast í 16-liða úrslit á HM. Hann skoraði bæði mörkin í 2-1 sigri á Hondúras. Mark Hondúras var sögulegt enda þeirra fyrsta á HM í 32 ár.

Ekvador er komið í annað sæti riðilsins með þrjú stig, rétt eins og Sviss. Frakkar eru með sex stig og þeir mæta Ekvador í lokaumferðinni.

Það var Carlo Costly sem kom Hondúras yfir með sögulegu marki. Fyrsta mark liðsins í 511 mínútur á HM og aðeins sex mínútum frá metinu þar sem beðið var lengst eftir marki.

Hondúras skoraði síðast á HM árið 1982. Það var í leik gegn Norður-Írlandi.

Hondúrassar voru þó ekki lengi í paradís því aðeins þrem mínútum síðar jafnaði Enner Valencia metin. Hann var að skora í sínum sjötta landsleik í röð.

Um miðjan síðari hálfleik dundi svo ógæfan aftur yfir lið Hondúras. Aukaspyrna sem hafnaði á enni Enner Valencia og það fór boltinn í netið. Hans þriðja mark í keppninni, takk fyrir. Hann er í hópi markahæstu manna.