Töffarinn frá Texas gefur út rapplag | Myndband

Clint Dempsey, landsliðsmaður Bandaríkjanna í fótbolta, kann sitthvað fleira en að sparka í bolta. Hann er nefnilega öflugur rappari og gaf á miðvikudaginn út nýtt lag af væntanlegri plötu sinni sem mun bera heitið Redux.

Dempsey, eða Töffarinn frá Texas eins og hann er kallaður, hefur jafnan hlaðið í nokkrar rímur í landsliðsferðum með bandaríska liðinu og hlotið góðar undirtektir.

Lagið heitir It´s Poppin og nýtur Dempsey, sem notar rapparanafnið Deuce, aðstoðar annars frægs rappara, XO. Hann eyddi tveimur vikum í byrjun árs í Los Angeles þar sem hann tók upp lagið með honum.

Dempsey skoraði fyrra mark Bandaríkjanna eftir 31 sekúndu gegn Gana í fyrsta leik liðsins á HM sem það vann, 2-1. Næst mæta Bandaríkjamenn Cristiano Ronaldo og félögum í Portúgal á sunnudagskvöldið og er spurning hvort þetta lag kveiki ekki í Könunum.