Tíu prósent lifa biðina ekki af

Um 250-300 manns eru á biðlista eftir hjartaþræðingu á Landspítala Íslands. Biðtíminn eru þrír mánuðir að jafnaði. Ekki allir lifa þetta langan biðtíma af en um 10% deyja áður en biðtíma lýkur.

Tækjaskortur og mannekla er ástæðan fyrir löngum biðtíma eftir hjartaþræðingu á Landspítala Íslands.



„Það er algjörlega óásættanlegt að fólk þurfi að bíða í fleiri fleiri mánuði með hjartað í sér, vélina sína,“ segir Ásgeir Þór Árnason, framkvæmdastjóri Hjartaheilla. 



Ásgeir segir jafnframt að frá því að hann hóf störf hjá Hjartaheilum hafi hann afar sjaldan geta sagt að biðlistinn sé nánast enginn. Hann segir mikinn skort á læknum og tækjabúnaði valda þessari löngu bið. Hann segir heilbrigðiskerfið í algjörum niðurskurði og þrátt fyrir að það vanti bráðnauðsynlega hluti séu þeir ófáanlegir vegna peningaskorts.

„Nú síðast í gær fékk ég símtal frá lækni sem var að óska eftir tæki. Bráðnauðsynlegu endurlífgunartæki.“

Með nýju tæki er hægt að stytta biðlistana og auka lífsgæði fjölda fólks sem nú býr við mikla óvissu. Rúmlega 700 manns deyja á ári hverju hér á landi af völdum hjarta- og æðasjúkdóma og 50 til 70 börn fæðast árlega með hjartagalla. Hjartadeildin þarf nauðsynlega að eignast nýtt hjartaþræðingartæki en þar eru framkvæmdar um 200 aðgerðir í hverjum mánuði.

Ásgeir segir það sjást á tölunum sem haldist hafa óbreyttar í fjölda ára að nú þurfi að gera róttækar breytingar. 

„Það er einn karl og ein kona á hverjum einasta degi sem látast af völdum hjarta- og æðasjúkdóma og þetta er sá sjúkdómur sem leggur flesta af velli. Þjóðin er að eldast og lífstíllinn hefur gert það að verkum að fólk er að fá þetta fyrr.“



Hjartaheill stendur nú fyrir söfnun á nýju tæki og lýkur söfnuninni á morgun. Nýtt tæki kostar um 180 milljónir króna og enn töluvert í að sett markmið náist. 

Biðlað er til landsmanna um að leggja fé til söfnunarinnar, en það er hægt með þrennum hætti: greiða valgreiðslu í heimabanka, hringja í styrktarsíma, eða leggja beint inn á reikning söfnunarinnar ef um hærri fjárhæðir er að ræða.



Styrktarsímanúmer:

907 1801 - 1000 kr. framlag

907 1803 - 3000 kr. framlag

907 1805 - 5000 kr. framlag



Reikningsnúmer: 

0513 - 26 - 1600

kt: 511083 0369 



Hægt er að kynna sér söfnunarátakið á heimasíðu Hjartaheilla.