Sveitarfélagið Ölfus neitar að afhenda útboðsgögn

Sveitarfélagið Ölfus neitar að afhenda útboðsgögn vegna útboðs sem fram fór nýlega, en þar samdi sveitarfélagið við Gámaþjónustuna. Íslenska gámafélagið vill fá að sjá hvaða forsendur lágu að baki útboði Gámaþjónustunnar. Úrskurðarnefnd um upplýsingamál tekur undir með Íslenska gámafélaginu og úrskurðaði að sveitarfélaginu væri skylt að afhenda Íslenska gámafélaginu gögnin. Enn neitar sveitarfélagið að afhenda gögnin og ætlar sér að fara með málið til dómstóla. „Það er með ólíkindum hvernig haldið er á þessu máli,“ segir Jón Þórir Frantzson, forstjóri Íslenska gámafélagsins.

Úrskurðarnefnd um upplýsingamál gaf út það úrskurðarorð þann 24. júlí síðastliðinn að sveitarfélaginu sé skylt að láta Íslenska gámafélaginu í té þau gögn sem Gámaþjónustan lagði til grundvallar tilboði sínu. Tilboð vegna umrædds útboðs voru opnuð 23. desember í fyrra. Sveitarfélagið hafnaði þeirri kröfu og krafðist þess að réttaráhrifum úrskurðarins yrði frestað. Á það féllst úrskurðarnefndin ekki heldur og kvað upp þann úrskurð þann 13. ágúst síðastliðinn.

Gæta hagsmuna einkafyrirtækis

Gunnsteinn R. Ómarsson, bæjarstjóri Ölfuss, segir hagsmuni sveitarfélagsins í þessu máli óverulega en að sama skapi séu hagsmunir viðsemjanda Ölfuss, Gámaþjónustunnar, nokkuð ríkir. Þegar hann er spurður hvers vegna bæjarfélagið vilji ekki ganga að úrskurði nefndarinnar segir hann það hagsmuni og ósk Gámaþjónustunnar. „Við gerum þetta vegna þess að viðsemjandi okkar telur álitamál hvort eigi að láta í té þessar upplýsingar og óskar eftir því að haldinn sé trúnaður við fyrirtækið,“ segir Gunnsteinn. „Beinir hagsmunir sveitarfélagsins eru óverulegir hvað þetta mál varðar. Það er verið að verða við þeirra óskum og þeirra hagsmunir eru kannski ríkari í þessu máli.“

Þegar Gunnsteinn er spurður að því hvar ákvörðun hafi verið tekin innan sveitarfélasins um að ganga svona langt með málið og andmæla úrskurðarnefnd um upplýsingamál, segir hann það ekki hafa verið gert opinberlega. Hvorki bæjarstjórn né bæjarráð Ölfuss hefur tekið málið fyrir með formlegum hætti. „Framkvæmdastjóri sveitarfélagsins tekur þessa ákvörðun í samráði við kjörna fulltrúa sveitarfélagsins en þetta hefur ekki verið bókað í fundargerðum sveitarfélagsins.“

Foreldrar eiga hlut í Gámaþjónustunni

Hinn 20. ágúst síðastliðinn var skrifað undir samning milli Gámaþjónustunnar og sveitarfélagsins Ölfuss, þess efnis að sveitarfélagið skuldbindur sig til að höfða mál til ógildingar á úrskurði úrskurðarnefndar um upplýsingamál. Gámaþjónustan er ekki aðili málsins en hefur „umtalsverða hagsmuni af niðurstöðu málsins“ eins og segir í samningnum. Gámaþjónustan skuldbindur sig á móti til að greiða allan þann kostnað sveitarfélagsins sem hlýst af málarekstrinum fyrir dómstólum.

Þegar Gunnsteinn er spurður hvort hann sé á nokkurn hátt tengdur Gámaþjónustunni persónulega segir hann: „Ekki eru nú persónuleg tengsl milli mín og Gámaþjónustunnar sem fyrirtækis beint, en ég get alveg viðurkennt það að ég á fjölskyldumeðlimi sem starfa hjá þessu fyrirtæki, báðir foreldrar mínir og bróðir.“

Samkvæmt heimildum fréttastofu eiga foreldrar Gunnsteins hlut í fyrirtækinu.

Þegar hann er spurður að því hvort hann hafi á einhverjum tímapunkti í þessu ferli hugað að því hvort hann væri vanhæfur til að standa að þessu máli telur hann svo ekki vera. „Í ljósi þess að þetta varðar ekki fjárhagslega hagsmuni sveitarfélagsins hef ég ekki talið ástæðu til þess.“