„Ég veit að höftin eru hindrun"

„Ég veit að höftin eru hindrun. Og þá skulum við takast á við þær hindranir,“

sagði Bjarni Benediktsson, formaður Sjálfstæðisflokksins, á fundi í Valhöll sem lauk rétt í þessu og fjallaði um Evrópumál.

Bjarni fór um víðan völl í ræðu sinni og rökstuddi ákvörðun sína að styðja þingsályktunartillögu Gunnars Braga Sveinssonar, sem felur í sér að draga aðildarumsókn Íslands í Evrópusambandið til baka.

Bjarni ítrekaði orð sín sem hann hefur látið falla í fjölmiðlum um að slíta eigi aðildarviðræðum við Evrópusambandið, því báðir ríkisstjórnarflokkarnir eru andvígir inngöngu. Hann gaf lítið fyrir þær kenningar að ef aðildarviðræðum sé slitið, verði ekki hægt að ganga í Evrópusambandið næsta áratuginn.

Hann sagðist fagna allri umræðu um Evrópumál, en taldi þingið ekki eiga að bíða eftir skýrslu Alþjóðamálastofnunar. Hann sagði ríkisstjórnina hafa gert samning við Hagfræðistofnun Háskóla Íslands sem væri sannarlega hlutlaus stofnun.

Bjarni sagði að flestir væru Evrópusinnar með þeim fyrirvara að góður samningur næðist, nema Össur Skarphéðinsson sem væri „síðasti móhíkaninn“ í þeim efnum.

„Við skulum hafa það í huga hér að enginn getur haldið því fram með gildum rökum að það sé ómögulegt að sækja aftur um inngöngu“ ef þær forsendur skyldu skapast að meirihluti væri fylgjandi aðild að Evrópusambandinu.

Bjarni ítrekaði að hann taldi mikinn mun vera á aðildarviðræðum og aðild í sambandið. Hann gaf lítið fyrir þær skoðanir að hægt væri að „kíkja í pakkann“.

Bjarni sagði að stefna ríkisstjórnar Framsóknar og Sjálfstæðisflokks væri að lækka skatta og að reka ríkissjóð hallalaust.

Bjarni var spurður af einum fundargesti hvaða kosningaloforð flokkurinn ætlaði að svíkja næst, en svaraði því ekki.