Ráðherra forðast Hafnfirðinga

Bæjarráð Hafnarfjarðar mun funda með þingmönnum kjördæmisins nú síðdegis vegna fyrirhugaðs flutnings Fiskistofu úr bænum til Akureyrar. Mikil gremja er í Hafnarfirði vegna málsins.

Á bæjarstjórnarfundi Hafnarfjarðar í gær voru lagðar fram tölur um þróun atvinnuleysis og íbúafjölda frá árinu 2007. Kom meðal annars fram að atvinnuleysi í Hafnarfirði í fyrra var 4,7 prósent en 3,5 prósent á Akureyri. Ennfremur að fjölgun íbúa á Akureyri var 7 prósent á sama tíma og íbúum á landsvísu fjölgaði um 6 prósent að meðaltali. Bæjarráð Hafnarfjarðar hefur skorað á Sigurð Inga Jóhannsson ráðherra að endurskoða ákvörðun sína um að flytja Fiskistofu, en Hafnfirðingum gengur illa að ná eyrum Sigurðar Inga, enn hafa ekki borist viðbrögð hans við áskoruninni. Rósa Guðbjartsdóttir er formaður bæjarráðsins.

„Nei, viðbrögð ráðherra eru engin enn sem komið er. Bæjarstjóri hefur reynt að ná sambandi við hann á síðustu dögum en ekki fengið nein svör ennþá. Við vonumst til að hann bregðist við þessu fyrr en síðar. Reyndar ætla bæjarfulltrúar í Hafnarfirði að hitta þingmenn og ráðherra, í þeim tilvikum, kjördæmisins núna í eftirmiðdaginn,“ segir Rósa. Og þar verður þetta mál rætt í þaula.

Við samanburð kemur í ljós að atvinnuástandið er síst betra í Hafnarfirði en á Akureyri.

„Já, sko með að taka saman þessar tölur erum við ekki að egna saman bæjarfélögum. Við erum bara að benda á að þessi byggðasjónarmið sem sögð eru búa þarna að baki standast ekki skoðun, eins og þessar tölur bera með sér. Þannig að okkur þótti tímabært að láta taka þetta saman og að þetta kæmi fram. 1. júlí síðastliðinn ályktaði bæjarráð Hafnarfjarðar, á móti þessum áformum. Og maður vænti þess í allri þeirri umræðu sem fram fór í samfélaginu í kjölfarið að það kæmu fram einhverjar tölulegar upplýsingar. En það hefur ekki gerst þannig að bæjaryfirvöld í Hafnarfirði fundu sig knúin til að gera þetta sjá. Og þarna sést að þessi rök ráðherrans standast ekki skoðun,“ segir Rósa.