Tónleikar á sérstökum stöðum

,,Þetta er bara svona lítil og væn folk-tónlistarhátíð sem var haldin fyrst 2012 en hefur verið að stækka smátt og smátt síðan,‘‘ segir Elín Ólafsdóttir, ein skipuleggjenda Baunagrassins á Bíldudal sem fer fram í þriðja sinn um helgina á Vestfjörðum.

,,Þegar við getum ekki verið úti þá höfum við verið að halda tónleikana á dálítið sérstökum stöðum sem eru ekki þessir týpísku tónleikastaðir,‘‘ segir Elín. ,,Eins og á fyrstu hátíðinni þá vorum við með pramma úti á sjó og siglt með tónlistarmennina út á prammann og til baka.‘‘

Í fyrra fóru tónleikarnir fram í frystihúsinu Arnarlaxi og að sögn Elínar fóru þeir svo vel fram að þar verða laugardagstónleikar aftur í ár.

,,Þar spila Skúli Mennski, Markús and the Diversion Sessions, Sverrir Bergmann og Halldór Gunnars úr Fjallabræðrum, þetta er bara skemmtileg folk-tónlist,‘‘ segir Elín en einnig verða tónleikar í Skrímslasafninu á Bíldudal á föstudeginum og er það Hafdís Huld sem kemur fram þar.

,,Hérna fyrir innan er síðan Selárdalur og mjög skemmtilegar slóðir að heimsækja og skoða,‘‘ segir Elín og mælir eindregið með því að fólk geri sér ferð um umhverfið í kringum Bíldudal.

,,Þarna bjó Gísli á Uppsölum, þarna er listasafn Samúels Jónssonar og síðan eru náttúrulaugar og ýmislegt skemmtilegt sem hægt er að gera,‘‘ segir Elín. ,,Fólk getur mætt á hátíðina sem er náttúrulega frítt fyrir alla og síðan kíkt í Selárdalinn að skoða list og njóta náttúrunnar.‘‘