Færeyingar stefna á að lenda í Reykjavík tvisvar í viku

Airbus A319 þota færeyska flugfélagsins Atlantic Airways lenti á Reykjavíkurflugvelli skömmu eftir hádegi í gær. Þetta var fyrsta reglubundna flug félagsins á þotunni síðan það fékk leyfi til lendingar nú í ágúst.

 

Færeyingar höfðu ekki mátt lenda vélinni í Reykjavík vegna skorts á öryggisleit á farþegum en nú hefur verið bætt úr því að sögn Friðþórs Eydal hjá ISAVIA. Því gaf Samgöngustofa út leyfi sem gildir í ótilgreindan tíma. Færeyingar stefna á að fljúga til Reykjavíkur tvisvar í viku.