Flugvélarnar sem Færeyingar skoða

Færeyska flugfélagið Atlantic Airways stefnir að því að taka minni flugvélartegund í notkun fyrir næsta sumar sem tæki 50-70 farþega. Jafnframt verður Airbus A319-þotum félagsins fækkað úr þremur niður í tvær frá næstu áramótum.

Þetta er liður í nýrri stefnumörkun félagsins sem felst í því að byggja upp þéttriðnara net áætlunarflugs milli Færeyja og næstu nágrannalanda; tíðni ferða verður aukin til Noregs, Bretlandseyja og Íslands. Þetta er gert undir slagorðunum „Atlantic Airways kemur heim“ en þar er fallið frá fyrri stefnu félagsins um að hasla sér völl á alþjóðlegum leiguflugsmarkaði með Airbus-þotunum, en þær taka allt að 144 farþega.

Jørgen Holme, forstjóri Atlantic Airways, segir í samtali við fréttastofuna að þrjár flugvélartegundir séu til skoðunar; Bombardier CRJ 200, Embraer 145 og Bombardier Q400. Tvær þær fyrstnefndu eru þotur, taka um 50 farþega og fljúga á um 800 kílómetra hraða. Sú þriðja er hraðfleyg skrúfuþota, tekur um 70 farþega og flýgur á um 660 kílómetra hraða.

Í fréttum Stöðvar 2 í gærkvöldi kom fram að færeyska flugfélagið hættir í lok ágúst notkun á Avro-100 þotum sínum, sem sinnt hafa Íslandsfluginu undanfarin 19 ár, og eru með um 100 sæti. Samkvæmt flugáætlun sem búið er að kynna færist flugið þá til Keflavíkur þar sem enn er óvíst hvort Airbus-þotur félagsins fái að nota Reykjavíkurflugvöll.

Þegar Jørgen Holme var spurður hvort færslan til Keflavíkur væri til frambúðar sagði hann það óráðið. Hann tók þó sérstaklega fram að félagið vildi hafa þann möguleika áfram að geta notað Reykjavíkurflugvöll.