Mótmæli í Istanbúl vegna aukins straums flóttafólks

Til átaka kom milli lögreglu og fleiri hundruð mótmælenda í tyrknesku borginni Istanbúl í gærkvöldi.

Mótmælendur lýstu þar yfir óánægju með þeim mikla straumi Sýrlendinga sem hafa haldið yfir landamærin til Tyrklands vegna borgarastyrjaldarinnar í heimalandinu.

Mótmælin áttu sér stað í Ikitelli-hverfinu í Evrópuhluta borgarinnar. Skemmdir voru unnar á verslunum, rúður brotnar og bílum velt þar sem ungmenni hrópuðu slagorð gegn Sýrlendingum. Tyrkneskir fjölmiðlar segja fimm hafa verið flutta á sjúkrahús.

Áætlað er að um 1,2 milljónir Sýrlendinga hafi farið frá Sýrlandi og til Tyrklands vegna borgarastyrjaldarinnar. Í frétt BBC segir að sýrlenskir flóttamenn séu áberandi í Istanbúl, þar sem margir þeirra grípa til þess ráðs að betla á götum úti.

Sameinuðu þjóðirnar áætla að tæpar þrjár milljónir Sýrlendinga hafi flúið land frá því að borgarastyrjöldin hófst. Flestir hafa farið til Líbanons, en fleiri hundruð þúsund flóttamanna hafa einnig haldið til Tyrklands, Jórdaníu og Íraks. Þá er áætlað að um 6,5 milljónir Sýrlendinga séu á vergangi innan landamæra Sýrlands.