Nýtt samkomulag um vopnahlé í Luhansk

Fulltrúar úkraínskra stjórnvalda og aðskilnaðarsinnar í austurhluta landsins hafa komist að samkomulagi um nýtt vopnahlé sem tekur gildi á föstudaginn.

Í frétt BBC segir að samkomulagið nái einungis til hersveita sem eiga í átökum í Luhansk-héraði. Deiluaðilar samþykkja að fjarlægja þungavopn frá svæðinu fyrir laugardaginn þó að ekki liggi fyrir um stærð hlutlausa svæðisins.

Fulltrúar deiluaðila eiga nú einnig í viðræðum um vopnahléssamkomulag sem myndi ná til Donetsk-héraðs. Mikil átök hafa geisað í kringum flugvöllinn í Donetsk síðustu daga.

Fulltrúar Öryggis- og samvinnustofnunar Evrópu stýrðu friðarviðræðunum, en stofnunin hefur fylgst náið með ástandinu í Úkraínu allt frá því að átök hófust þar í apríl síðastliðinn.

Samið var um vopnahlé þann 5. september en það hefur margoft verið brotið og hafa rúmlega þúsund manns látist síðan og fjölmargir særst.