„Verst að missa pabba“

Söngkonan Anna Mjöll Ólafsdóttir hefur marga fjöruna sopið. Á síðustu þremur árum hefur hún gifst og skilið tvívegis, gengið í gegnum erfitt fósturlát og misst föður sinn, tónlistarmanninn Ólaf Gauk Þórhallsson. „Það verður ekkert erfitt eftir að hafa misst pabba. Það var það versta. Réttarhöld, skilnaðir, fósturlát og hvað sem það er, það verður bara miklu miklu minna.“

Anna Mjöll starfar í dag á djassklúbbi í Bel Air-hverfinu í Los Angeles, syngur í einkaboðum og tekur að sér tilfallandi verkefni. Hún er stödd hérlendis eins og stendur, meðal annars til að syngja á tónleikum í kvöld á Café Rosenberg.

Óskar engum þess að missa fóstur

Fyrir tveimur árum varð Anna óvænt ólétt en missti fóstur á fimmta mánuði. „Það var alveg svakalega erfitt, ég var farin að finna fyrir spörkum frá litlum fótboltagæja og þetta var algjör martröð að lenda í. Ég var þarna með dáið barn inni í mér og var rúllað í gegnum gang þar sem voru myndir af nýfæddum börnum og allir ofsalega hamingjusamir og ég brotnaði gjörsamlega niður.“ Í dag getur hún vel hugsað sér að eignast barn ef líkaminn leyfir, jafnvel ættleiða barn eða fá sér nýjan hund.

Leitar að næsta eiginmanni

Ástarlíf söngkonunnar hefur óneitanlega vakið athygli og þá sérstaklega þegar hún giftist bílasalanum Cal Worthington 2011 en hann var sléttri hálfri öld eldri en hún. „Ef ég hef ekkert að gera í söngnum þá fer ég og gifti mig,“ segir Anna Mjöll hlæjandi. „Mér finnst bara karlmenn svo skemmtilegir og fallegir allir, hver á sinn hátt, svo það er bara svo erfitt að velja.“ Hún viðurkennir þó að ástarlífið sé ekki gamnið eitt og allt taki þetta á. Vissulega sé hægt að setjast niður og velta sér upp úr vandamálunum en einnig sé hægt að velja að gera það ekki og það kjósi hún.